26.07.2026 | 21:56
Խուդաթյանը շրջայց է կատարել Իրանում կառուցվող թունելում և ճանապարհի կառավարման կենտրոնում
Արդար ընտրություն է, առանց որևէ երկմտության․ IRI դիտորդական առաքելության ղեկավար․ ՏԵՍԱՆՅՈՒԹ
08.06.2026 | 15:27
Միջազգային հանրապետական ինստիտուտի (IRI) դիտորդական առաքելությունը Երևանում կայացած մամուլի ասուլիսի ժամանակ ամփոփել է Հայաստանում անցկացված խորհրդարանական ընտրությունների դիտարկման արդյունքները: Առաքելության ղեկավար Փիթեր Ռոսկամը շեշտել է, որ իրենց հիմնական եզրահանգումը միանշանակ է՝ ընտրությունները եղել են արդար։
«Մեր եզրահանգումն այն է, որ սա արդար ընտրություն է՝ առանց որևէ երկմտության: Մեր դիտորդական առաքելության արդյունքներով և հավաքական տպավորությամբ ձևավորվել է հենց այսպիսի կարծիք»,- նշել է Ռոսկամը։
Որպես հետագա շարունակական բարելավման առաջնահերթ քայլ՝ նա ընդգծել է քաղաքական ֆինանսավորման թափանցիկության ապահովումն ու վերահսկողության ուժեղացումը.
«Իշխանությունները պետք է մեծացնեն պատժամիջոցները չհայտարարագրված կամ կեղծ հայտարարագրված կանխիկ դրամական միջոցների համար: Բացի այդ, պետք է վերացվեն անորոշությունները՝ կապված այն հարցի հետ, թե ով և ինչի համար է վճարում, և հստակեցվի, թե գումարները, ի վերջո, որտեղից են գալիս: Սա կլիներ անհավատալիորեն կարևոր և նշանակալի առաջին քայլը»,- ասել է դիտորդական առաքելության ղեկավարը։
IRI Եվրասիայի տարածաշրջանային ծրագրերի տնօրեն Սթիվեն Նիքսն էլ հայտնել է, որ առաքելության աշխատանքն այսքանով չի ավարտվում։
«Միջազգային հանրապետական ինստիտուտի երկարաժամկետ դիտորդները և երևանյան գրասենյակի աշխատակազմը կմնան Հայաստանում: Նրանք կշարունակեն հետևել և մշտադիտարկել հնարավոր հետընտրական դատական գործընթացները, ինչպես նաև հավանական բողոքի ակցիաները, եթե այդպիսիք լինեն»,- նշել է Նիքսը։
Առաքելության ներկայացուցիչները նշեցին, որ ընտրությունների ընթացքում կատարած մշտադիտարկումների վերջնական հաշվետվությունը հանրությանը կներկայացվի առաջիկա 30-ից 60 օրվա ընթացքում։
Մանրամասները՝ տեսանյութում։
