Ֆրանսիական կործանիչներն առաջին ԱԹՍ-ն են խոցել Լատվիայի օդային տարածքում․ ևս մեկ դրոն մտել է Մոլդովայի տարածք ու պայթել

Հունիսի 8-ի առավոտյան ՆԱՏՕ-ի ֆրանսիական կործանիչները խոցել են Լատվիայի օդային տարածք մտած անօդաչու թռչող սարքը, հաղորդում է Delfi-ն՝ հղում անելով Լատվիայի ազգային զինված ուժերին։ Current time-ի փոխանցմամբ՝ սա առաջին դեպքն է, երբ երկրից դուրս Լատվիայի օդային տարածք մտնող անօդաչու է խոցվում: Նման միջադեպեր գրանցվել են նաև նախկինում, բայց անօդաչու թռչող սարքերը երբեք չեն ոչնչացվել:

Լատվիայի զինված ուժերը չեն նշել, թե ում է պատկանում անօդաչու թռչող սարքը։

ԶՈՒ-ի տվյալներով՝ անօդաչուն երկրի օդային տարածք է մտել արևելքից։ Լատվիայի Լուձ և Ռեժեկնե համայնքների բնակիչներն օդային տարածքում սպառնալիքի մասին «նարնջագույն» նախազգուշացում են ստացել, ինչը նշանակում է, որ պետք է ապաստան գտնեն։ Հարևան Ալուկսնե և Բալվի համայնքների բնակիչները ստացել են «դեղին» ազդանշան, որը վկայում է օդային հարձակման տագնապի մասին, սակայն այնպիսին, որի ընթացքում որևէ հետագա գործողություն չի պահանջվում։ Անօդաչու թռչող սարքը խոցումից հետո ընկել է լիճն և պայթել։

ՆԱՏՕ-ի Բալթյան երկրների օդային պարեկության առաքելության կործանիչն Էստոնիայի երկնքում խոցել է ևս մեկ անօդաչու թռչող սարք։

Հունիսի լույս 8-ի գիշերն էլ Մոլդովայի օդային տարածք է ներխուժել մեկ այլ անօդաչու թռչող սարք. դրա պայթած բեկորները հայտնաբերվել են Օրգեյի շրջանի Լոպատնա գյուղի մոտ գտնվող դաշտում։

Մոլդովայի արտաքին գործերի նախարարությունը խստորեն դատապարտել է միջադեպը՝ այն անվանելով Մոլդովայի ազգային անվտանգությանը սպառնալիք և պետական ​​ինքնիշխանության խախտում: Նախարարությունը հայտարարել է, որ «մեծ հավանականությամբ»՝ պայթած անօդաչու թռչող սարքն ուկրաինական ծագում է ունեցել։ Սակայն Ուկրաինայի արտաքին գործերի նախարար Անդրեյ Սիբիհան հայտարարել է, որ  անօդաչուն ռուսական է եղել։

Թարգմանությունը՝ Էմմա Չոբանյանի