Բանակը նուրբ օրգանիզմ է, բանակի հետ պետք է հասկանալ ինչ ես անում․ իսկ այս դասալիքների Կառավարությունը դա ի վիճակի չէ․ Դավիթ Շահնազարյան․ ՏԵՍԱՆՅՈՒԹ

«Հանրապետական» կուսակցության պատգամավորի թեկնածու Դավիթ Շահնազարյանը պնդում է՝ «Մարտի 1-ի» վերաբերյալ ինքը վերջերս որևէ նոր բան չի ասել, նախկինում է ասել, և ինչ ասել է՝ տեր է դրանց։

Այս մասին այսօր հրավիրված մամուլի ասուլիսի ժամանակ ասաց Դավիթ Շահնազարյանը՝ նշելով, որ վերջերս ընդամենը նկարագրել է այն, ինչին ականատես է եղել։

«Ես ասել եմ, որ շշեր են ջարդել։ Մարդիկ շատ լավ գիտեն՝ ինչ է եղել, այն, ինչ ասել եմ, բոլորը շատ լավ գիտեին, և այդ շատ լավ իմացողներն իրենց դրել են ռետինե խողովակի տեղ և որ ամենավտանգավորն է՝ «Մարտի 1-ի» զոհվածների հարազատներին փորձում են մոլորեցնել»,- ասաց նա։

Դավիթ Շահնազարյանը խոսեց նաև վերջին շրջանում բանակի շուրջ կատարվողի մասին և շեշտեց, որ բանակը դարձրել են թիրախ։

«Դուք չե՞ք զգացել, որ բանակի նկատմամբ առաջին օրվանից հարձակումներ են գնում Փաշինյանի կողմից, չե՞ք զգացել, հիմա էլ բանակը դարձրել է թիրախ։ Երբ առաջին գծից մարտական գեներալներին և սպաներին ծանուցագրերով կանչում են ՀՔԾ, և ինչ-որ կապիտանի հավասար աստիճան ունեցողները նրանց սպասեցնում են ժամերով, դա ուղղակի ուղված է բանակի դեմ։ Ավելին՝ դրա նպատակն է բանակը բերել այն վիճակի, ինչ վիճակում որ ոստիկանությունն է և կրկնում եմ՝ դա նպատակ է, ոչ թե գալիս է, այսպես ասած, անգործությունից։ Բանակը նուրբ օրգանիզմ է, որ բանակի հետ պետք է հասկանալ ինչ ես անում․ իսկ այս դասալիքների Կառավարությունը դա ի վիճակի չէ հասկանալ»։

Մանրամասները՝ տեսանյութում։