25.05.2026 | 23:41
Գյումրիի արտահերթ ընտրություններ ենք իրականացնելու. Նիկոլ Փաշինյան. ՏԵՍԱՆՅՈՒԹ
ՊԵԿ-ը արձագանքել է կաշառքի կասկածանքով ձերբակալված աշխատակիցների դեպքին
Հասարակություն
25.05.2026 | 22:15
Պետական եկամուտների կոմիտեն հայտարարել է, որ խստորեն դատապարտում է կոռուպցիոն ցանկացած դրսևորում և ընդգծել՝ կաշառքի կասկածանքով ձերբակալված աշխատակիցների գործողությունները անհամատեղելի են պետական ծառայողի վարքագծի չափանիշների հետ։
«Պետական եկամուտների կոմիտեն խստորեն դատապարտում է կոռուպցիոն ցանկացած դրսևորում և անընդունելի համարում ծառայողական դիրքի օգտագործումը անձնական շահի նպատակով։
Կոմիտեն վերահաստատում է, որ կոռուպցիայի նկատմամբ ցուցաբերում է զրոյական հանդուրժողականություն և համակարգի բարի համբավը ստվերող ցանկացած վարքագիծ արժանանալու է խիստ իրավական գնահատականի։
Չնայած ՊԵԿ-ում շարունակաբար իրականացվող հակակոռուպցիոն և ինստիտուցիոնալ բարեփոխումներին՝ առանձին աշխատակիցների նման գործողությունները չեն կարող համատեղելի լինել պետական ծառայողի վարքագծի և պատասխանատվության չափանիշների հետ։
ՊԵԿ-ը վստահեցնում է, որ իրավապահ մարմինների հետ սերտ համագործակցությամբ հետևողականորեն շարունակելու է համակարգում կոռուպցիոն ռիսկերի բացառմանն ու նմանատիպ երևույթներն արմատախիլ անելուն ուղղված աշխատանքները։
Կոմիտեն կրկին հորդորում է իր բոլոր աշխատակիցներին խստագույնս պահպանել օրենսդրության և ծառայողական էթիկայի պահանջները՝ չվարկաբեկելով ՊԵԿ-ում իրականացվող լայնածավալ բարեփոխումների ընթացքը»,- ասվում է հայտարարության մեջ։
Ավելի վաղ տեղեկացրել էինք, որ Երևանում կաշառք ստանալու կասկածանքով ձերբակալվել են ՊԵԿ-ի երկու աշխատակիցներ, որոնք, ըստ հաղորդման, հյուրանոցի սեփականատիրոջից պահանջել էին 250 հազար դրամ՝ խախտումների համար տուգանք չկիրառելու դիմաց։ Այս մասին տեղեկացնում են ՆԳՆ ոստիկանությունից։
