14.09.2026 | 19:22
Պապիկյանը և Ֆրանսիայի դեսպանը քննարկել են գործակցության հեռանկարներին առնչվող հարցեր
Գուրգեն Մարգարյանի անվան դպրոցը չի փակվելու. վարչական ղեկավար
24.05.2026 | 23:29
Արտամետի Գուրգեն Մարգարյանի անվան ավագ դպրոցը շարունակելու է գործել։ Այս մասին Factor TV-ի հետ զրույցում վստահեցրեց Արտամետի վարչական ղեկավար Գոռ Ղազարյանը։
Նրա խոսքով՝ համայնքում ԿԳՄՍ նախարարության կողմից միավորման ենթակա դպրոցների հրապարակված ցանկն են տեսել, որտեղ ներառված է եղել նաև Արտամետի ավագ դպրոցը։
«Դա տեսնելուց հետո դիմել ենք տարբեր կառույցների, այդ թվում՝ վարչապետի աշխատակազմ։ Գրությունը Արմավիրի մարզպետարան է հասցեագրվել, մոտ մեկ ամիս առաջ հստակ պատասխան ենք ստացել, որ գյուղի դպրոցը չի փակվելու։ Գյուղը փոքր է, 35 աշակերտ ունի, որից 2-ը նախակրթարան են հաճախում։ Այն ուզում էին Վանանդ գյուղի դպրոցի հետ միավորել, այնտեղ նոր դպրոց է կառուցվում, արտամետցի երեխաները պետք է այնտեղ գնային։ Բնակիչների կողմից ուղարկված նամակին ի պատասխան մեզ մոտ մեկ ամիս առաջ վստահեցրել են, որ միավորում տեղի չի ունենալու»,-նշեց Ղազարյանը։
Արտամետի գյուղապետի խոսքով՝ դպրոցի անվանափոխության հարցն ընդհանրապես քննարկման առարկա չի դարձել։
Նշենք, որ ավելի վաղ դպրոցի փակման վերաբերյալ ֆեյսբուքյան իր էջում գրառում էր կատարել «Ուժեղ Հայաստան» դաշինքի ընտրական ցուցակը գլխավորող Նարեկ Կարապետյանը․ «ՔՊ-ն փակում է Գուրգեն Մարգարյանի անվան դպրոցը»:
Factor TV-ն հարցի վերաբերյալ պարզաբանում ստանալու համար դիմել է նաև ԿԳՄՍ նախարարություն, գերատեսչությունից պատասխանը ստանալուց հետո այն կհրապարակենք։
Եվգենյա Համբարձումյան
