Անդրանիկ Թևանյանը կալանավորվեց

Անդրանիկ Թևանյանը 2 ամսով կալանավորվեց: Այս մասին Factor TV-ին հայտնեցին Քննչական կոմիտեից:

Պետական դավաճանության հոդվածով մեղադրվող Թևանյանին կալանավորելու միջնորդությունը քննում էր դատավոր Գարիկ Աբելյանը:

Թևանյանը «Բարգավաճ Հայաստան» կուսակցության ցուցակով Ազգային ժողովի ընտրություններին մասնակցող պատգամավորի թեկնածու է:

Հիշեցնենք, որ մեղադրանքի վերաբերյալ Քննչական կոմիտեն հաղորդագրություն է տարածել՝ հայտնելով, թե Անդրանիկ Թևանյանը 622 հազար ԱՄՆ դոլարի դիմաց ԱԺ փակ նիստից ռուսերենով թարգմանված տեղեկություներ է փոխանցել օտարերկրյա հատուկ ծառայությունների ներկայացուցիչներին:

Ըստ ՔԿ-ի՝ ՀՀ քաղաքացի Անդրանիկ Թևանյանը, որը 2021 թվականի խորհրդարանական ընտրություններում աջակցել է «Հայաստան» դաշինքին և ընդգրկված եղել նույն դաշինքի համապետական ընտրական ցուցակում, 2024 թվականին հավաքագրվել է օտարերկրյա հատուկ ծառայությունների կողմից։

Քննության տվյալներով՝ Ա.Թ.-ն համագործակցել է «Ռուսսիա Կովկաս» աշխարհաքաղաքական կենտրոնի տնօրենի հետ, որը, ըստ իրավապահների, հանդիսացել է օտարերկրյա հատուկ ծառայությունների ներկայացուցիչ։ Վերջինիս հանձնարարությամբ, ըստ հաղորդման, նա զբաղվել է լրտեսությամբ և փոխանցել պետական գաղտնիք պարունակող տեղեկություններ։ Խոսքը, ենթադրաբար, վերաբերում է 2024 թվականի ապրիլին Ազգային ժողովում անցկացված փակ նիստին, որի ընթացքում քննարկվել են «Հայաստանի Հանրապետության և Ադրբեջանական Հանրապետության միջև սահմանազատման ու սահմանագծման հիմնախնդիրները»։ Այդ նիստին մասնակցել է ՀՀ արտաքին գործերի նախարար Արարատ Միրզոյանը։ Հաջորդ օրը՝ կառավարության հետ հարցուպատասխանի ընթացքում, Արարատ Միրզոյանը հայտարարել էր․ «Երեկ ես, օգտվելով այն հնարավորությունից, որ նիստը փակ էր և այն, ինչ կասվի իմ կողմից հասանելի կլինի միայն Հայաստանի քաղաքական դաշտին, մասնավորապես խորհրդարանական ընդդիմությանը, և չի հասնի այլ մայրաքաղաքներ, փորձեցի ռացիոնալ բացատրություն տալ, ռացիոնալ երկխոսություն ծավալել՝ բացատրելով, որ Հայաստանի Հանրապետությունը բանակցություններում, այդ թվում՝ առաջին հերթին սահմանազատման բանակցություններում, կարող է առաջնորդվել կամ հենվել միայն լեգիտիմության հենքերի վրա»։

ՔԿ-ի պնդմամբ՝ Ա.Թ.-ն ռուսերեն թարգմանված տեսքով փոխանցել է փակ նիստի ընթացքի և արդյունքների վերաբերյալ տեղեկություններ՝ դրա դիմաց ստանալով առանձնապես խոշոր չափերի՝ 622 հազար ԱՄՆ դոլար։ Քրեական վարույթը նախաձեռնվել է ՀՀ քրեական օրենսգրքի 418-րդ հոդվածի 1-ին մասով՝ պետական դավաճանության, և 424-րդ հոդվածի 1-ին մասով՝ լրտեսության հատկանիշներով։
Անդրանիկ  Թևանյանն իրեն առաջադրված մեղադրանքը չի ընդունում:

Նշենք, որ Թևանյանի վերաբերյալ քրեական գործընթացներին նախորդել է վարչապետ Նիկոլ Փաշինյանի հայտարարությունն այն մասին, որ ԱԱԾ-ն պատրաստվում է պետական դավաճանության վերաբերյալ հաղորդում ներկայացնել Քննչական կոմիտեին: Նկատենք, որ Փաշինյանին Թևանյանի վերաբերյալ սպասվող գործընթացները հասանելի են դարձել այն պայմաններում, երբ նա նախընտրական քարոզարշավ իրականացնելու նպատակով գտնվում է արձակուրդում:

Անդրանիկ Թևանյանը 2021թ. հունիսի 20-ին ԱԺ պատգամավոր է ընտրվել «Հայաստան» կուսակցությունների դաշինքի համապետական ընտրական ցուցակով: 2023 թվականի օգոստոսի 17-ին, սակայն, վայր է դրել պատգամավորական մանդատը։

Արաքս Մամուլյան