«Ռադդ քաշի՛, համբալի մեկը»․ թեժ լեզվակռիվ Փաշինյանի և Արթուր Օսիպյանի միջև․ ՏԵՍԱՆՅՈՒԹ

Քարոզարշավի 11-րդ օրը լարված է։ Արցախցի Արթուր Օսիպյանը մոտեցավ վարչապետ Նիկոլ Փաշինյանին և հարցեր ուղղեց Արցախի կարգավիճակի, բանակցային գործընթացի, ինչպես նաև Արցախի նախկին իշխանություններին Հայաստանի կողմից տրամադրված ֆինանսական աջակցության վերաբերյալ։

Օսիպյանը պնդեց, որ հրապարակված բանակցային փաստաթղթերում չկա որևէ ձևակերպում, ըստ որի՝ Արցախի հարցը պետք է լուծվեր Ադրբեջանի տարածքային ամբողջականության շրջանակում։ Նա հիշեցրեց նաև 1992 թվականի ԵԱՀԿ փաստաթուղթը և նշեց, որ նույնիսկ 2019 թվականի բանակցային տարբերակում հանրաքվեի միջոցով կարգավիճակի որոշման հնարավորություն կար։

Բանավեճի ընթացքում Օսիպյանը նաև մեղադրեց ՀՀ իշխանություններին Արցախի նախկին ղեկավարների՝ Բակո Սահակյանի և Արայիկ Հարությունյանի ղեկավարած համակարգին ֆինանսավորելու մեջ։ Նրա խոսքով՝ Հայաստանից փոխանցված միլիարդավոր դրամները գնացել են «կլանի գրպանները», մինչդեռ Արցախում ընդդիմադիր խմբերը պայքարում էին այդ համակարգի դեմ։

Փաշինյանը հակադարձեց, որ ֆինանսական միջոցները տրամադրվել են Արցախի ժողովրդին, և Հայաստանի կառավարությունը համագործակցել է գործող քաղաքական համակարգի հետ։ Նրա խոսքով՝ Հայաստանն ապահովել է թոշակների, նպաստների և սոցիալական այլ վճարների իրականացումը, իսկ եթե ֆինանսավորումը դադարեցվեր, նույն ուժերը կմեղադրեին Հայաստանին՝ Արցախը սովի մատնելու մեջ։

Օսիպյանը վարչապետին հարց ուղղեց Հայաստանի անվտանգության և Ադրբեջանի կողմից առաջ քաշվող պահանջների մասին՝ նշելով, որ Բաքուն միջազգային հարթակներում բարձրացնում է ադրբեջանցի փախստականների վերադարձի հարցը։ Փաշինյանը կտրուկ արձագանքեց՝ հայտարարելով, որ նման հարց Հայաստանի օրակարգում չկա և Օսիպյանին մեղադրեց «ադրբեջանական նարատիվներ» տարածելու մեջ։

Ապա իրավիճակը սրվեց, Փաշինյանը Օսիպյանին հորդորեց  հեռանալ։

«Էս Ղարաբաղի պսևդոէլիտաները թող ռադ լինեն ստեղից ընդհանրապես։ Որևէ մեկը չհամարձակվի… ա՛յ փախածներ, արա՛, դու ի՞նչ գործ ունես ստեղ ընդհանրապես։ Էս ովքե՞ր են արա սրանք։ Եկել են, մատ են թափ տալիս էս Ղարաբաղի պսևդոէլիտաները։ Ռադներդ քաշեք, արա ընդհանրապես։ Ով եք դուք, արա՛։ Ղարաբաղի հարցը որ կար, գնայիք զոհվեիք, դուք խի՞ եք կենդանի ընդհանրապես»,- ասաց Փաշինյանը։

Մանրամասները՝ տեսանյութում։

Տեսանյութը պարունակում է վիրավորական խոսույթ։ Factor TV-ն նախընտրական փուլում առավել առաջնային համարելով հանրության իրազեկ լինելու իրավունքը՝ հրապարակում է քաղաքական գործիչների խոսքը բառացի՝ միաժամանակ դատապարտելով ու կոչ անելով զերծ մնալ վիրավորանքից ու ատելության խոսքից։