Թուրքիան և Կատարը կարող են միանալ Սաուդյան Արաբիայի ու Պակիստանի պաշտպանական պայմանագրին

Պակիստանը հայտնում է, որ Թուրքիան և Կատարը կարող են միանալ Սաուդյան Արաբիայի հետ կնքված փոխադարձ պաշտպանական համագործակցության մասին պայմանագրին, քանի որ ԱՄՆ-Իրան պատերազմը վերաձևավորում է Մերձավոր Արևելքում և Հարավային Ասիայում անվտանգության դիրքերը, հաղորդում է Bloomberg-ը, փոխանցում է Turkiye today-ը:

Պակիստանի պաշտպանության նախարար Խավաջա Ասիֆը տեղական հեռուստաեթերում հայտարարել է, որ համաձայնագիրը ներկայում վերջնական մշակման փուլում է։

«Եթե Կատարն ու Թուրքիան նույնպես միանան այս գործող համաձայնագրին, դա ողջունելի զարգացում կլինի»,- ասել է Ասիֆը։

Նախարարը նշել է, որ նախաձեռնությունը նպատակ ունի ստեղծել համագործակցության ավելի լայն հարթակ «նման մտածողությամբ» պետությունների միջև՝ տարածաշրջանային կայունությունն ու կոլեկտիվ անվտանգությունն ամրապնդելու համար։

Bloomberg-ի հաղորդմամբ՝ ընդլայնված դաշինքը կմիավորի Սաուդյան Արաբիային և Թուրքիային այն ժամանակ, երբ ԱՄՆ-Իրան պատերազմը հակամարտության մեջ է ներքաշել Մերձավոր Արևելքի ավելի լայն շրջանակները։

Սաուդյան Արաբիան և Պակիստանը սեպտեմբերին ստորագրել էին պաշտպանական պայմանագիր, որում նշվում էր, որ «երկրներից որևէ մեկի դեմ ցանկացած ագրեսիա կհամարվի ագրեսիա երկուսի դեմ էլ»։

Պակիստանը նաև ԱՄՆ-ի և Իրանի միջև բանակցությունների հիմնական միջնորդն է։ Երկու երկրները մի քանի հանդիպումներ են անցկացրել այն բանից հետո, երբ Իրանը սկսեց պատասխան հարձակումներ իր հարևանների, այդ թվում՝ Սաուդյան Արաբիայի դեմ։

Անցյալ ամիս պակիստանյան ռազմական ուժերը ժամանել էին Սաուդյան Արաբիայի Թագավոր Աբդուլազիզ ավիաբազա՝ համատեղ ռազմական համագործակցությունը բարելավելու, տարածաշրջանում անվտանգությանն ու կայունությանը աջակցելու համար։

Թարգմանությունը՝ Էմմա Չոբանյանի