Հարցն այն չի եղել՝ Մեղրին տալու են, թե չէ, այլ այն՝ ով է տալու, երբ և ինչ պայմաններով. Փաշինյան․ ՏԵՍԱՆՅՈՒԹ

«Կհամաձայնվեք, թե չէ, բայց տարիներ շարունակ, երբ «Մեղրի» բառը արտասանել ենք, այն միշտ ուղեկցվել է ինչ-որ տագնապով, անհանգստությամբ, թախիծով։ Հիշում եք չէ՞՝ «Մեղրին տվեցին, հեսա տալու են», ընդ որում՝ դա մենակ մեր ժամանակ չի եղել, մեզնից առաջ էլ է եղել։ Հարցը այն չի եղել, թե Մեղրին տալու են, թե չեն տալու, հարցն այն է եղել, թե ով է տալու, երբ է տալու և ինչ պայմաններով է տալու»,- իր քարոզարշավի երկրորդ օրը Մեղրիում քաղաքացիների հետ հանդիպման ժամանակ ասաց վարչապետ Նիկոլ Փաշինյանը, որը նաև «Քաղաքացիական պայմանագիր» կուսակցության վարչապետի թեկնածուն է։

Նա մեղրեցիներին վստահեցրեց՝ 2025 թվի օգոստոսի 8-ից հետո Մեղրի անունը ոչ միայն թախծոտ չի հնչում, այլև հնչում է ուրախ, հրաշալի. «Նախագահ Թրամփի հետ մենք Մեղրի ենք քննարկում, նախագահ Պուտինի հետ Մեղրի ենք քննարկում, նախագահ Մակրոնի հետ Մեղրի ենք քննարկում, նախագահ ֆոն դեր Լայենի և Կոշտայի հետ Մեղրի ենք քննարկում, որոնք բոլորը հիմնականում հետաքրքրվում են՝ լավ, այդ ճանապարհը ե՞րբ է լինելու, որովհետև բոլորը սպասում են, որ Մեղրին վերջապես էլի վերադառնա համաշխարհային խաչմերուկի իր կարգավիճակին։ Այդ որ ասում ենք՝ «Խաղաղության խաչմերուկ», հիմա մեր աչքի առաջ Խաղաղության խաչմերուկը հյուսիսից հարավ և արևելքից արևմուտք տեղի է ունենում։ Եվ որ ասում ենք՝ Խաղաղության խաչմերուկ, Մեղրին դրա սիրտն ու հոգին է»։

Փաշինյանը նաև նշեց, որ Հայաստանի պատմության ողջ պատմության ընթացքում ամենաերկար կամուրջն է կառուցվում այսօր, այն էլ Մեղրիում․ «700 մետր երկարությամբ կամուրջ է կառուցվում և Մեղրին դառնում է խաչմերուկ»։

Մանրամասները՝ տեսանյութում։

Ռոզա Վարդանյան