Ադրբեջանում բռնաճնշումների վերաբերյալ լսումներ են անցկացվել ԵԽ-ում

Եվրոպական խորհրդարանի մարդու իրավունքների ենթահանձնաժողովը մայիսի 7-ին լսումներ է անցկացրել Ադրբեջանի վերաբերյալ։ Ադրբեջանական լրատվամիջոցների հաղորդմամբ՝ ելույթ են ունեցել լրագրող Լեյլա Մուստաֆաևան և փաստաբան Սամադ Ռահիմլին։

Free Voices Collective-ի ներկայացուցիչ, Բեռլինում գործող «Gazetci»-ի գլխավոր խմբագիր Լեյլա Մուստաֆաևան ասել է, որ Ադրբեջանում ճնշումները խորացել են Եվրախորհրդարանի կողմից անցյալ տարվա դեկտեմբերին խաղաղության ակտիվիստ Բահրուզ Սամեդովի և էթնիկ փոքրամասնությունների հարցերով հետազոտող Իքբալ Աբիլովի վերաբերյալ բանաձևի ընդունումից հետո:

«2023 թվականի վերջից ի վեր Ադրբեջանի կառավարությունը քաղաքացիական հասարակության դեմ աննախադեպ ճնշումների ալիք է սկսել: Քաղբանտարկյալների թիվը հասել է մոտավորապես 400-ի: Չնայած Եվրախորհրդարանի կողմից հետազոտողներ Բահրուզ Սամեդովի և Իքբալ Աբիլովի ազատ արձակման պահանջից անցել է չորս ամիս, երկուսն էլ շարունակում են մնալ բանտում: Սամեդովը տեղափոխվել է ցածր անվտանգության բանտ, մինչդեռ Աբիլովի բողոքարկումը մերժվել է»,- ասել է լրագրողը։

Նա նշել է, որ չնայած Ադրբեջանում դատական ​​բարեփոխումների համար եվրոպական կողմից տրամադրված 23 միլիոն եվրոյի ֆինանսական աջակցությանը՝ ադրբեջանական բանտերում շարունակվում են խոշտանգումները, վատ վերաբերմունքը և բժշկական օգնության բացակայությունը։

«Meydan TV-ի լրագրողներ Այթաչ Թափդիգը, Խայալա Աղաևան, Այսել Ումուդովան և Ուլվիյա Ալին կալանքի տակ գտնվելու ընթացքում ենթարկվել են սեռական ոտնձգությունների: Մեդիա փաստաբան Ալասգար Մամեդլին, հետաքննող լրագրող Հաֆիզ Բաբալին և Meydan TV-ի գլխավոր խմբագիր Այնուր Էլգյունեշը շտապ կարիք ունեն մասնագիտական ​​բժշկական զննման և բուժման: Անցյալ շաբաթ նախկին տեղեկատվական տեխնոլոգիաների մասնագետ Իլգար Ալիևը, որը USAID-ի կողմից աջակցվող թվային անվտանգության դասընթացներ էր անցել անկախ լրագրողների համար, մահացած է հայտնաբերվել իր խցում՝ թմրանյութերի կեղծ մեղադրանքներով երկու տարուց ավելի բանտարկությունից հետո: Նրա մահը քաղաքացիական հասարակության նկատմամբ աննախադեպ ճնշման վերջին օրինակն է, որը շարունակվում է անդադար»,- շեշտել է նա։

Լեյլա Մուստաֆաևան նաև ասել է, որ Եվրամիությունը և նրա անդամ պետությունները պետք է բոլոր քաղբանտարկյալների ազատ արձակումը դարձնեն Բաքվի հետ ցանկացած ապագա համագործակցության հստակ և պաշտոնական պայման, այդ թվում՝ ԵՄ-Ադրբեջան ռազմավարական գործընկերության օրակարգի շրջանակում։ Ըստ նրա՝ «Եվրամիության խորհուրդը պետք է քննարկի թիրախային պատժամիջոցներ այն պաշտոնյաների նկատմամբ, ովքեր հավաստիորեն ներգրավված են մարդու իրավունքների լուրջ խախտումների մեջ»։

Մայիսի 1-ին Ադրբեջանի խորհրդարանը որոշում էր կայացրել կասեցնել Եվրոպական խորհրդարանի հետ համագործակցությունը բոլոր ոլորտներում։

Թարգմանությունը՝ Էմմա Չոբանյանի