Եթե մինչև այս տարեվերջ չստորագրեինք, կկորցնեինք այդ գումարը. Էրիկ Գրիգորյանը՝ աննախադեպ դրամաշնորհի մասին. ՏԵՍԱՆՅՈՒԹ

Եթե մինչև այս տարեվերջ չստորագրեինք, կկորցնեինք այդ գումարը: Այսօր՝ նոյեմբերի 22-ին ՀՀ կառավարության նիստից հետո լրագրողների հետ ճեպազրույցում ասաց բնապահպանության նախարարի պաշտոնակատար Էրիկ Գրիգորյանը՝ պատասխանելով 23 մլն եվրոյի դրամաշնորհային ծրագրի մասին հարցին:

«Պրոցեսը բավական երկար է տևել: Նախորդ տարիներից եկող գումար էր, և եթե մինչև այս տարվա վերջ չէինք ստորագրում, աշխատանք չէինք տանում, կորցնում էինք այդ գումարը: Ոչ միայն մենք, այլ նաև և՛ ֆինանսների նախարարությունը, և՛ ԱԳՆ բավական աշխատել են, որ այդ գումարը ստանանք»,- հավելեց պաշտոնյան:

Նշենք, որ խոսքը Հայաստանի և Վերականգնման վարկերի բանկի միջև ստորագրված «Հայաստանում կենսաբազմազանության և կայուն տեղական զարգացման»՝ 23 մլն 208 հազար դոլարի դրամաշնորհային համաձայնագրի մասին է: 8-ամյա ծրագրի իրականացման ընթացքում նախատեսվում է ապահովել կենսաբազմազանությամբ հարուստ տարածքներում բնական ռեսուրսների պահպանությունն ու կայուն օգտագործումը:

Դրամաշնորհային ծրագրի շրջանակում նախատեսվում է իրականացնել պահպանվող տարածքների, բնական ռեսուրսների և բնական հուշարձանների բարելավում ու կառավարում, անտառների կայուն կառավարում, անտառային լանդշաֆտը և անտառները վերականգնելու միջոցառումներ, ընտրված հարակից համայնքներում սոցիալ-տնտեսական զարգացման միջոցառումներ, էկոզբոսաշրջությունը խթանելու միջոցառումներ, ինչպես նաև  խորհրդատվական ծառայություններ տրամադրել:

Ըստ բնապահպանության նախարարության՝ ծրագրի իրականացման համար թիրախային տարածքներն աշխարհագրորեն սահմանափակված չեն, այն հնարավոր է իրագործել Հայաստանի ցանկացած վայրում: Ակնկալվում է, որ դրամաշնորհային այս ծրագրով հնարավոր կլինի Հայաստանում շրջակա միջավայրի պահպանության ոլորտում հստակ արդյունքներին ուղղված լայնածավալ միջոցառումներ իրականացնել:

Մանրամասները՝ տեսանյութում