«Ուժեղ Հայաստան»-ի անդամների պնդումները, թե իրենք ոչ թե ՔՊ-ին, այլ «Իմ քայլ»-ին էին գումար փոխանցել, հիմնադրամից հերքում են

Factor.am-ն անդրադարձել էր 2025 թվականին «Ուժեղ Հայաստան» կուսակցության անդամներ Ալեքսան Ալեքսանյանի և Ռոբերտ Կադարյանի կատարած 2 մլն դրամ նվիրատվություններին «Քաղաքացիական պայմանագիր» կուսակցակությանը։ Մեր հրապարակմանն արձագանքելով՝ թե՛ Ալեքսանյանը, թե՛ Կադարյանը պնդել էին, որ իրենք նվիրատվություն են արել ոչ թե կուսակցակությանը, այլ՝ «Իմ քայլը» հիմնադրամին՝ կրթական ծրագրի իրականացման համար։

Factor.am-ը գրավոր հարցմամբ դիմել է «Իմ քայլը» հիմնադրամին՝ պարզելու՝ արդյո՞ք հիմնադրամն անցած տարի Ալեքսան Ալեքսանյանից ու Ռոբերտ Կադարյանից նվիրատվություններ ստացել է։

Ի պատասխան՝ հիմնադրամից տեղեկացրել են․ «Իմ Քայլը» բարեգործական հիմնադրամը 2025 թվականին նվիրատվություն չի ստացել Ռոբերտ Գրիգորի Կադարյանից և Ալեքսան Բենիամինի Ալեքսանյանից»։

«Ուժեղ Հայաստան»-ի անդամների կատարած նվիրատվության հետ կապված որևէ «շփոթմունք», որ փոխանցումն արվի բարեգործական հիմնադրամին, սակայն այն հայտնվի կուսակցության հաշվեհամարին, բացառել էր նաև ՔՊ վարչության անդամ, կուսակցության ֆինանսական հարցերով պատասխանատու Արուսյակ Մանավազյանը՝ ընդգծելով նաև, որ կուսակցությունը կրթական ծրագրեր չի իրականացնում։

Հիշեցնենք, որ «Քաղաքացիական պայմանագիր» կուսակցությունը Գյումրիի և Փարաքարի ավագանիների ընտրությունների քարոզարշավներն ու կազմակերպչական աշխատանքները ֆինանսավորելու նպատակով 2025-ի փետրվարի 21-ին հայտարարել էր դրամահավաք՝ իր աջակիցներին կոչ անելով նվիրատվությունները փոխանցել կուսակցության հաշվեհամարին։ Ռոբերտ Կադարյանը 2 մլն դրամի փոխանցումը կուսակցության հաշվեհամարին կատարել էր մարտի 5-ին, Ալեքսան Ալեքսանյանը 2 մլն փոխանցել էր մարտի 7-ին։ 

Գայանե Խաչատրյան