14.07.2026 | 12:30
Իրանը փրկել է օտարերկրյա բեռնանավի անձնակազմին Հորմուզի նեղուցում բախումից հետո
Սոցցանցերում տարածվող «գորգե» անցումներից իրական է միայն մեկը
04.05.2026 | 01:04
Համացանցում տարածվում են լուսանկարներ, որոնցում երեւում է, որ Երևանի տարբեր փողոցների հետիոտնային անցումները ներկվել են հայկական գորգերի նախշերով։ Շրջանառվում է չորս լուսանկար, սակայն դրանցից միայն մեկն է իրական, իսկ մնացածը ստեղծված են արհեստական բանականության միջոցով։
Լուսանկարները տարածվում են ֆեյսբուքյան օգտատերերի կողմից, ապա արտատպվում նաև իշխանական կայքերում (medianews, armtimes):
Factor.am-ը կապ է հաստատել նկարազարդումն իրականացրած Gandz Graffiti ընկերության հետ, որը պարզաբանել է, որ գորգի նախշով փողոցի նկարազարդում իրականացվել է միայն Աբովյան–Պուշկին խաչմերուկում, և նախաձեռնությունը նախատեսվում է շարունակական դարձնել նաև այլ հատվածներում:
Երեկոյան Երևանում զբոսնելիս ՀՀ վարչապետ Նիկոլ Փաշինյանը Ֆրանսիայի նախագահ Էմանուել Մակրոնին ներկայացրել է հենց այդ հատվածում պատկերված հայկական գորգի նախշը։
ԱԲ-ով ստեղծված լուսանկարներն առաջինը Կամո Թովմասյանն (Kamoblog) է տարածել, ով ավելի ուշ հայտնել է, թե դրանով Կենտրոն վարչական շրջանի ղեկավար Պետրոս Պետոյանին ցանկացել է հուշել, որ դրանք ևս իրականություն դառնան:
Այսպիսով, համացանցում տարածվող մյուս լուսանկարներում պատկերված գորգանման անցումները իրական չեն և ստեղծված են արհեստական բանականության միջոցով։
Անի Թամրազյան
