Գեղամ Գևորգյանը` հեղուկ գազի դեֆիցիտի մասին

ՀՀ մրցակցության և սպառողների պաշտպանության հանձնաժողովի նախագահ Գեղամ Գևորգյանը լրագրողների հետ ճեպազրույցում անդրադարձել է հեղուկ գազի շուկայում արձանագրված դեֆիցիտին և կտրուկ գնաճին, ինչպես նաև պարզաբանումներ է տվել Հայաստան ադրբեջանական բենզինի ներկրման դեպքի վերաբերյալ։

Լրագրողների դիտարկմանը, թե հեղուկ գազի շուկայում կրկին կիսաճգնաժամային իրավիճակ է, գազ չկա կամ դժվարությամբ է գտնվում, իսկ եղածն էլ կտրուկ թանկացել է, Գեղամ Գևորգյանը նախ ընդգծեց, որ ոլորտում հակամրցակցային համաձայնություններ լինել չեն կարող, քանի որ շուկան խիստ մրցակցային է։ Թանկացման հիմնական պատճառը նա համարում է Վերին Լարսի անցակետի փակ լինելը։

«Հայաստանի Հանրապետությունում հեղուկ գազ մատակարարում են 100-ից ավելի տնտեսվարող սուբյեկտներ: Որևէ մեկը նույնիսկ չի գերազանցում 10 տոկոսի շեմը, այսինքն՝ դաշտը խիստ մրցակցային է, և տեսականորեն որևէ մեկը չի կարող գերիշխող դիրք չարաշահել։ Օրենքով արգելված է 10 տոկոսից ներքև որևէ տնտեսվարողի նկատմամբ պրոցես գեներացնել ամբողջ աշխարհում: Չկա խոշոր տնտեսվարող սուբյեկտ, որը կարող է արհեստական դեֆիցիտ կամ խնդիր ստեղծել։ Ռուսաստանի Դաշնությունից էր մատակարարվում գազը, և չէր եկել, քիչ էր։ Դրա համար այն մարդիկ, ովքեր ունեին քիչ քանակի գազ, որպեսզի արագ չսպառվի, իրենց գազի գինը բարձրացրել էին»,- նշելէ ՄՍՇՊՀ նախագահը։

Գևորգյանը հավելել է, որ Լարսը պարբերաբար փակվում է եղանակային պայմանների պատճառով, ինչն անմիջականորեն ազդում է ինքնարժեքի վրա. «Եթե վարորդը քշում է, և 10 օրում պետք է գնար-հասներ, բայց կանգնում է սահմանին խցանման մեջ, նախ իր գինն է թանկանում, որովհետև ինքն այդ ժամանակ աշխատավարձ է տալիս, վճարներ է կատարում, և այդ ապրանքը չի հասնում այստեղ։ Ու եթե ինչ-որ մեկի մոտ կա պայմանական 100 լիտր հեղուկ գազ, ինքը դա ավելի դանդաղ է վաճառում և ավելի թանկ, որ միանգամից չվերջանա ու իր մոտ մնա այդ պաշարը։ Բնական է, որ գինը թանկանում է»։