02.07.2026 | 17:43
ՌԴ-ից երկու ռուֆերներ բարձրացել են Նյու Յորքի Empire State Building-ի վրա և այնտեղ նշանվել․ ՏԵՍԱՆՅՈՒԹ
ՄԱԿ-ը հայտնում է, որ Իրանում պատերազմի սկզբից ի վեր մահապատժի է ենթարկվել առնվազն 21 մարդ, ձերբակալվել՝ 4000-ը
Քաղաքականություն
29.04.2026 | 17:01
ՄԱԿ-ի մարդու իրավունքների գրասենյակի տվյալներով՝ Իրանում ԱՄՆ-ի և Իսրայելի հետ պատերազմի սկզբից ի վեր մահապատժի է ենթարկվել առնվազն 21 մարդ, իսկ ձերբակալվել՝ 4000-ը, գրում է CNN-ը։
Մահապատիժները կատարվել են Իրանի կողմից այլախոհության դեմ պայքարի ֆոնին, մասնավորապես՝ «ազգային անվտանգության հետ կապված մեղադրանքների» միջոցով, այսօր հայտարարել է ՄԱԿ-ի մարդու իրավունքների գերագույն հանձնակատար Վոլկեր Տյուրքը։
Գործակալությունը հայտնել է, որ առնվազն ինը մարդ մահապատժի է ենթարկվել 2026 թվականի հունվարի բողոքի ցույցերի կապակցությամբ, տասը՝ ընդդիմադիր խմբավորումներին ենթադրյալ անդամակցության համար, իսկ երկուսը՝ լրտեսության մեղադրանքով։
Փետրվարի 28-ից ի վեր «Իրանում ազգային անվտանգության հետ կապված մեղադրանքներով, ըստ գնահատականների, ձերբակալվել է ավելի քան 4000 անձ»։
Հայտարարության մեջ ասվում է, որ ձերբակալվածներից շատերը բռնի կերպով անհետացել են, խոշտանգվել կամ ենթարկվել են «դաժան, անմարդկային և նվաստացուցիչ վերաբերմունքի»։
«Ես սարսափած եմ, որ հակամարտության արդեն իսկ ծանր հետևանքներից բացի, Իրանի ժողովրդի իրավունքները շարունակում են խլվել իշխանությունների կողմից՝ դաժան և բռնի ձևերով», – ասել է Տյուրքը։
Նա նաև կոչ է արել Իրանի իշխանություններին դադարեցնել հետագա մահապատիժները և սահմանել մահապատժի կիրառման մորատորիում, նաև լիովին ապահովել պատշաճ դատավարության և արդար դատաքննության երաշխիքները, ինչպես նաև անհապաղ ազատ արձակել կամայականորեն ձերբակալվածներին։
Թարգմանությունը՝ Էմմա Չոբանյանի
