02.07.2026 | 23:29
Կալանավորվել է գնդապետ Էդիկ Մալոյանը
Բելառուսն ու Լեհաստանը 5-ը 5-ի դիմաց ձերբակալվածների փոխանակում են իրականացրել
Քաղաքականություն
28.04.2026 | 17:53
Բելառուսն ու Լեհաստանը ձերբակալվածների են փոխանակել՝ 5-ը 5-ի դիմաց սկզբունքով։ Մինսկի կողմից ազատ արձակվածների թվում է լրագրող Անջեյ Պոչոբուտը, հաղորդում է բելառուսական պետական BelTA-ն, գրում է Current time-ը։
«Գործողության արդյունքում տարբեր երկրների տասը քաղաքացիներ ազատ են արձակվել, նրանց հնարավորություն է տրվել վերամիավորվել իրենց ընտանիքների հետ։ Ազատ արձակվածների թվում են Բելառուսի քաղաքացիներ, որոնք կատարել են հատկապես կարևոր առաքելություններ մեր երկրի ազգային անվտանգության և պաշտպանության ապահովման շահերից ելնելով»,- ասվում է բելառուսական կողմի հայտարարության մեջ։
Պոչոբուտը ներառվել է փոխանակման ցուցակում, ենթադրաբար, Պոչոբուտի մոր և Անժելիկա Բորիսի անձնական խնդրանքով։
Լեհաստանի վարչապետ Դոնալդ Տուսկը լրագրողի հետ լուսանկար է հրապարակել X-ում։
Наша Нiва-ն հաղորդում է, որ Լեհաստանն ազատ է արձակել ռուս հնագետ Ալեքսանդր Բուտյագինին, որը Կիևի պահանջով ձերբակալվել էր Վարշավայում 2025 թվականի դեկտեմբերին: Լեհաստանի դատախազության տվյալներով՝ Ուկրաինայում նա կասկածվում է մշակութային ժառանգության օբյեկտի մասնակի ոչնչացման և 201,6 միլիոն գրիվնան (4,8 միլիոն դոլար) գերազանցող վնասի պատճառման մեջ:
Փոխանակումը տեղի է ունեցել ապրիլի 28-ին բելառուսա-լեհական սահմանի Պերերով-Բելովեժա անցակետում: Հաղորդվել է, որ Բելառուսում և Ռուսաստանում լրտեսության համար դատապարտված անձինք տեղափոխվել են Վարշավա, իսկ ԵՄ և այլ երկրներում կալանավորվածները՝ Մինսկ: Բելառուս վերադարձվածների թվում կան Բելառուսի, Ռուսաստանի և ԱՊՀ այլ երկրների քաղաքացիներ:
ԱՄՆ նախագահի Բելառուսի հարցերով հատուկ դեսպան Ջոն Քոուլը հայտարարել է, որ ինքն ու իր թիմը նպաստել են Լեհաստանի երեք և Մոլդովայի երկու քաղաքացիների ազատ արձակմանը։
Լրագրող, ակտիվիստ Անջեյ Պոչոբուտը ձերբակալվել էր Գրոդնոյում 2021 թվականի մարտին։ Նրան մեղադրանք է առաջադրվել ատելություն հրահրելու և ազգային անվտանգությանը վնաս հասցնելուն ուղղված գործողությունների կոչ անելու համար։ Ակտիվիստի դեմ առաջադրված մեղադրանքների թվում են «Լեհաստանի դեմ խորհրդային ագրեսիայի մասին խոսակցությունները», «Gazeta Wyborcza»-ում 2020 թվականին բողոքի ցույցերը ցրելու մասին հոդվածը և 2006 թվականին Գրոդնոյի շրջանում լեհական հակակոմունիստական խմբավորման հրամանատարի մասին 2006 թվականի հոդվածը։ 2023 թվականի փետրվարին նա դատապարտվել էր ութ տարվա ազատազրկման՝ խիստ ռեժիմի բանտում։
Թարգմանությունը՝ Էմմա Չոբանյանի
