17.08.2026 | 10:34
ՊԵԿ նախկին պաշտոնյայից պահանջվում է բռնագանձել անշարժ գույք, մեքենաներ և ավելի քան 194 մլն դրամ
Բելգորոդում ուկրաինական ԱԹՍ-ների հարձակումների հետևանքով 3 մարդ է զոհվել
Քաղաքականություն
28.04.2026 | 12:24
Ուկրաինական անօդաչու թռչող սարքերի հարձակումների հետևանքով զոհվել է 3 քաղաքացիական անձ։ Եվս 3-ը, այդ թվում՝ 16-ամյա տղա, տարբեր վնասվածքներ են ստացել։ Այս մասին տելեգրամում հայտարարել է Բելգորոդի մարզի նահանգապետ Վյաչեսլավ Գլադկովը, գրում է BBC-ի ռուսական ծառայությունը։
Սահմանային Շեբեկինսկի շրջանի Վոզնեսենովկա գյուղում անօդաչու թռչող սարքի հարվածից անմիջապես հետո մեկ տղամարդ մահացել է։
Ռակիտյանսկի շրջանի Բոբրավա գյուղում մեկ այլ անօդաչու թռչող սարք հարվածել է ընտանիքին տեղափոխող մեքենային։
«Տղամարդը և կինը մահացել են շտապօգնության մեքենայի ժամանումից առաջ»,- հայտնել է նահանգապետը։
Նշվում է, որ նրանց 16-ամյա որդուն շտապօգնության անձնակազմը տեղափոխում է տարածաշրջանային մանկական կլինիկական հիվանդանոց։ Նահանգապետի խոսքով՝ Բորիսովսկի շրջանի Կրասիվո գյուղում անօդաչուն հարձակվել է մեկ այլ մեքենայի վրա, որի հետևանքով վիրավորվել են ամուսիններ։
Նախօրեին Գլադկովը հայտնել էր Շեբեկինսկի շրջանի սահմանամերձ Նովայա Տավոլժանկա գյուղում անօդաչու թռչող սարքի հարվածի հետևանքով տղամարդու մահվան մասին։
Ուկրաինական կողմը չի մեկնաբանել Բելգորոդի մարզի վրա անօդաչու թռչող սարքերի կանոնավոր հարձակումները։
Թարգմանությունը՝ Էմմա Չոբանյանի
