Ես ընդամենը հղում էի անում Հակակոռուպցիոն կոմիտեի նախագահի ասածին. Աննա Հակոբյան․ ՏԵՍԱՆՅՈՒԹ

Աննա Հակոբյանը հրավիրած հրատապ մամուլի ասուլիսի ընթացքում Factor TV-ի հարցին ի պատասխան մեկնաբանեց իր նախկին հայտարարությունը, որտեղ չէր բացառել, որ «Իմ քայլը» հիմնադրամի գործունեության վերաբերյալ կարող է քրեական հետապնդում սկսվել՝ հղում անելով Հակակոռուպցիոն կոմիտեի նախագահ Արթուր Նահապետյանի հայտարարությանը։

«Իմ նշված տեսանյութի մեջ ես հղում եմ անում Ձեր նշած անձնավորությանը։ Քրեական գործ հարուցելու մասին հարցը մնացել է անպատասխան, ինչից ենթադրել եմ, որ հնարավոր է։ Իմ հղումը չի նշանակում, որ ես անձամբ նման կարծիք եմ հայտնել, այլ արձանագրել եմ փաստը՝ հնչել է հարց, և պատասխանն այդպիսի հնարավորություն է թողել մեկնաբանելու։ Ընդամենը հղում եմ արել։ Հղում եմ արել հանրահայտ փաստին»,- ասաց Հակոբյանը։

Հիշեցնենք՝ Նիկոլ Փաշինյանից հեռանալու և կառավարական ամառանոցը լքելու մասին հրաժեշտի տեսանյութում Աննա Հակոբյանը չէր բացառել, որ  որպես հիմնադրամի գործադիր տնօրեն՝ կարող է քրեական պատասխանատվության ենթարկվել։ Նա հղում էր արել Հակակոռուպցիոն կոմիտեի նախագահի հայտարարությանը։

Փետրվարի 24-ին խորհրդարանում իրավապահ կառույցի նախագահ Արթուր Նահապետյանն ասել էր, որ ուսումնասիրվում է այդ թվում՝ «Իմ քայլը» հիմնադրամի գործունեությունը։ Նահապետյանի այդ պատասխանի հիմքն անգլերենի սկսնակ մակարդակի ուսուցման անվճար դասընթացների մասին «Իմ քայլը» հիմնադրամի հայտարարությունն էր, որի մասին հիմնադրամը հայտարարել էր ընտրությունների նշանակման օրվանից հետո։ 

Մանրամասները՝ տեսանյութում։