27.04.2026 | 16:16
Փաստաբաններիս խնդրել եմ դիտարկել Իոաննիսյանի դեմ հաղորդում ներկայացնելու հնարավորությունը. Հակոբյան․ ՏԵՍԱՆՅՈՒԹ
Սոնա Մնացականյանի մահից 4 տարի անց որևէ մեկը չի պատժվել. մյուս տարի վաղեմության ժամկետը կլրանա
Հասարակություն
27.04.2026 | 12:58
Լուսանկարը՝ «Հետք»-ի
29-ամյա Սոնա Մնացականյանի և նրա չծնված փոքրիկի մահից 4 տարի անց որևէ մեկն այդպես էլ չի պատժվել ողբերգական պատահարի համար։ Ավելին, վտանգ կա, որ վաղեմության ժամկետը կանցնի. քրեական վարույթ նախաձեռնվել է նախկին Քրեական օրենսգրքով, ինչը ենթադրում է, որ գործով վաղեմության ժամկետը 5 տարի է. 2027 թվականի ապրիլի 26-ին կլրանա գործով 5 տարին, ինչը կենթադրի քրեական հետապնդման դադարեցման, քրեական պատասխանատվությունից ազատման և գործի կարճման։
Հիշեցնենք՝ 2022 թվականի ապրիլի 26-ին վարչապետ Նիկոլ Փաշինյանի ավտոշարասյան անցնելու համար հերթական անգամ փակվել էր Պարոնյան-Լեո փողոցների խաչմերուկը։ 31 շաբաթական հղի Սոնա Մնացականյանը հետիոտնային անցումը փորձել էր հատել հենց այն պահին, երբ արագությունը գերազանցելով՝ սլանում էր Փաշինյանին ուղեկցող շարասյան մեքենաներից մեկը։ Ոստիկանության մայոր Արամ Նավասարդյանի վարած մեքենան մահացու վրաերթի էր ենթարկել Մնացականյանին։ Պատահարից հետո ո՛չ նա, ո՛չ ուղեկցող մյուս մեքենաների, ո՛չ էլ Փաշինյանի մեքենայի վարորդը չէին դադարեցրել ընթացքը։ Նավասարդյանն ավելի ուշ վերադարձել ու մասնակցել էր քննչական գործողություններին։ Գործով միակ մեղադրյալը նա է, սկզբում ձերբակալվել էր, հետո նրա նկատմամբ ընտրվել էր ստորագրություն չհեռանալու մասին խափանման միջոցը։ Պաշտպանական կողմը մինչ օրս չի ընդունում առաջադրված մեղադրանքը։
«Ուղեկցող մեքենան չէր կարող նման արագությամբ ձախ շրջադարձ կատարել։ Խաչմերուկում եղել է երթևեկությունը կարգավորող, ուստի՝ տվյալ դեպքում Սոնա Մնացականյանը խաչմերուկը պիտի հատեր ոչ թե նայելով լուսացույցին, այլ ենթարկվեր երթևեկությունը կարգավորողի հրահանգներին, ուստի՝ Մնացականյանը տեսել ու չի ենթարկվել ոստիկանի հրահանգին։ Սա անզգույշ պատահար է եղել»,- դատարանում նշել էր Արամ Նավասարդյանի պաշտպան Ռուբեն Բալոյանը։
Շուրջ 3 տարի տևած դատաքննությունից հետո անցած տարվա օգոստոսին դատարանը՝ դատավոր Կարեն Ֆարխոյանի նախագահությամբ, վճռել էր Արամ Նավասարդյանին 1,5 տարվա ազատազրկման դատապարտել և նույնչափ էլ մեքենա վարելու իրավունքից զրկել։ Դատավարական երկու կողմն էլ դատավճիռը բողոքարկեց. մայիսի 18-ին հայտնի կդառնա՝ Վերաքննիչ քրեական դատարանը կամ Ֆարխոյանի դատավճիռը կթողնի նույնը, կամ կբեկանի, կամ նոր քննության կուղարկի։
Ինչպես անցած 4 տարիներին, այնպես էլ երեկ ի հիշատակ Մնացականյանի և նրա չծնված փոքրիկի, Պարոնյան-Լեո հատվածում անցորդները մոմավառություն են իրականացրել, ծաղիկներ և խաղալիքներ դրել պատահարի վայրում։
Ռոզա Վարդանյան
