Վահան Կոստանյանը եվրոպացի դիվանագետներից նվերներ է ստացել

ՀՀ արտաքին գործերի փոխնախարար Վահան Կոստանյանը ապրիլին ստացած նվերներ է հայտարարագրել։ Այս մասին Factor.am-ը տեղեկանում է պաշտոնյանների՝ ԿԿՀ ներկաայացրած նվերների հաշվառման ձևաթղթից։ 

Ավստրիայի խորհրդարանի Ավստրիա-Հայաստան բարեկամական խմբի նախագահ Մարտինա ֆոն Քյունսբերգ Սարրեն Վահան Կոստանյանին «R.Horn» բրենդի՝ կաշվե գրչապանակ և «Cerruti 1881» բրենդի՝ Ավսրտիայի հանրապետության խորհրդարանի լոգոյով բրենդավորված գրիչ և նույն գրիչի համար նախատեսված Cerruti 1881 լիցքավորվող սև թանաքի գլանակ է նվիրել (Cerruti 1881 Refill Rollerball Black): 

Նվերի արժեքը գնահատվել է 85,410  դրամ։ Գինը որոշելու համար ուսումնասիրվել են նվերների տուփերի վրա պատկերված տարբերանշաները։ 

Մարտինա ֆոն Քյունսբերգ Սարրեի գլխավորած պատվիրակությանը Հայաստան էր ժամանել ապրիլի 9-ին։ 

Փոխարտգործնախարարը նվեր է ստացել նաև ապրիլի 14-ին Ֆրանսիայի Եվրոպայի և արտաքին գործերի նախարարության եվրոպական հարցերով լիազոր նախարար Բենժամեն Հադադի գլխավորած պատվիրակության այցի ընթացքում։ Ֆրանսիացի դիվանագետը «The Nines» բրենդի՝ օվալաձև, սոդալիտե և արծաթյա ճարմանդ է նվիրել Կոստանյանին: Ստացողի կողմից գնահատված արժեքը 65,262 դրամ է։ 

Գինը որոշելու համար ուսումնասիրվել է նվերի տուփերի վրա պատկերված տարբերանշանը, որը պատկանում է ավստրիական «The Nines» բրենդին: Արժեքները պարզելու նպատակով իրականացվել է համացանցային բաց աղբյուրներում առկա կայքերի ուսումնասիրություն։

Հիշեցնենք՝ «Հանրային ծառայության մասին» օրենքը սահմանում է հանրային ծառայողների կողմից նվերներ ընդունելու վերաբերյալ  կանոններ։  

Ըստ այդ կարգավորումների՝ պետությանը կամ համայնքին են հանձնվում պետական, պաշտոնական այցերի, միջոցառումների, ինչպես նաև աշխատանքային այցերի, գործուղումների շրջանակում տրվող նվերները, եթե դրանց արժեքը գերազանցում է 60,000 ՀՀ դրամը: 

Անի Թամրազյան