ՆԱՏՕ-ն Բալթիկ ծովի վրա ռուսական ինքնաթիռներ է որսացել

Ֆրանսիական Rafale կործանիչները, Շվեդիայի, Ֆինլանդիայի, Լեհաստանի, Դանիայի և Ռումինիայի ինքնաթիռների հետ միասին, ապրիլի 20-ին Բալթիկ ծովի վրա թռչող ռուսական ռազմավարական ռմբակոծիչներ, ինչպես նաև Տու-22Մ3 գերձայնային հրթիռակիր ռմբակոծիչներ, Սու-30 և Սու-35 կործանիչներ են որսացել։ Այս մասին ֆրանսիական հրամանատարությունը հայտնել է միջադեպից մեկ օր անց, գրում է DW-ի ռուսական ծառայությունը։

Հայտարարվում է, որ Ռուսաստանը տեղակայել է երկու Տու-22Մ3, ինչպես նաև մոտ 10 Սու-30 և Սու-35՝ «ավելի մեծ ռազմավարական ռմբակոծիչների» ուղեկցելու համար։ Associated Press-ի լրագրողն ականատես է եղել, թե ինչպես են երկու Rafale-ներ թռիչք կատարում Լիտվայի Շյաուլայ քաղաքի օդանավակայանից։

Ռուսաստանի Պաշտպանության նախարարությունն ապրիլի 20-ին հայտնել էր, որ տեղի է ունեցել «պլանավորված թռիչք Բալթիկ ծովի չեզոք ջրերի վրայով»: Նշվում էր, որ Տու-22Մ3 հեռահար ռմբակոծիչները, որոնց ուղեկվել են Սու-35 կործանիչները, թռել են ավելի քան չորս ժամ:

«Երթուղու որոշակի փուլերում հեռահար ռմբակոծիչներն ուղեկցվել են օտարերկրյա կործանիչներով»,- ասվում է հաղորդագրության մեջ։

ՊՆ-ն պնդում է, որ թռիչքները կատարվել են միջազգային կանոնակարգերին համապատասխան:

Լիտվայի Պաշտպանության նախարարության տվյալներով՝ ապրիլի 13-ից 19-ը ՆԱՏՕ-ի օդաչուները չորս անգամ բարձրացել են օդ՝ թռիչքի կանոնները խախտող ռուսական ինքնաթիռները որսալու համար։ Այդ խախտումների թվում են եղել տրանսպոնդերների անջատումը, թռիչքի իրականացումը՝ առանց պլան ներկայացնելու և, ըստ ՆԱՏՕ-ի, օդային երթևեկության կարգավարների հետ կապի բացակայությունը։

Թարգմանությունը՝ Էմմա Չոբանյանի