25.08.2026 | 13:56
Դուք կատարելագործվելու տեղ չունեք, ոնց չունի «Ժիգուլին»․ Կոնջորյանը՝ ընդդիմությանը․ ՏԵՍԱՆՅՈՒԹ
Ադրբեջանը չի ապահովել Լեռնային Ղարաբաղի հակամարտությունից տուժած անձանց պաշտպանությունը. Amnesty International
Քաղաքականություն
21.04.2026 | 17:45
Ադրբեջանի իշխանություններն անողոքաբար ճնշում են այլախոհության բոլոր ձևերը, հարյուրավոր անձինք բանտարկված են անհիմն և քաղաքական դրդապատճառներով։ Այս մասին ասվում է Amnesty International միջազգային իրավապաշտպան կազմակերպության՝ ապրիլի 21-ին հրապարակված տարեկան զեկույցում, գրում են ադրբեջանական լրատվամիջոցները։
Նշվում է, որ անկախ ՀԿ-ներն ու հասարակական խմբերը բախվում են խիստ սահմանափակումների։ Խաղաղ բողոքի ցույցերը ճնշվում են։ Խոշտանգումները և այլ վատ վերաբերմունքը, ինչպես նաև մեղավորների անպատժելիությունը շարունակում են լայնորեն տարածված մնալ։ Կանայք և ԼԳԲՏ անձինք շարունակում են բախվել խտրականության, սեռական բռնության և ոտնձգությունների։
Փաստաթուղթը հիշեցնում է, որ Ադրբեջանը շարունակել է խորացնել հարաբերությունները ԱՄՆ-ի ու ԵՄ-ի հետ՝ չնայած մարդու իրավունքների վատթարացող վիճակին։
Կազմակերպությունը նշում է, որ «ԶԼՄ-ների մասին» օրենքում 2022 թվականին կատարված փոփոխությունները իշխանություններին լիազորություն են տվել արգելափակել անկախ կայքերն ու անօրինական հայտարարել օտարերկրյա լրատվամիջոցների գրասենյակները։
Զեկույցում նաև ընդգծվում է BBC-ի ադրբեջանական ծառայության և «Թուրան» գործակալության գործունեության կասեցումը։ Հաղորդվում է, որ շուրջ 30 լրատվամիջոցների աշխատակիցներ ներկայում բանտում են, իսկ տասնյակ լրագրողների և ակտիվիստների անօրինական կերպով արգելվել է լքել երկիրը՝ առանց նախնական ծանուցման։
Փաստաթղթում դատապարտվում են ադրբեջանական բանտերում պահման պայմանները։ Ասվում է, որ բանտարկյալները երկար ժամանակ պահվում են մենախցում, սպառնում են սեռական բռնությամբ և համակարգված կերպով զրկվում են բժշկական օգնությունից։
Զեկույցում ներկայացվում են նաև Բաքվի կողմից միջազգային մարդասիրական իրավունքի խախտումները։ Նշվում է, որ Ադրբեջանի իշխանությունները չեն կարողացել ապահովել պատասխանատվության ենթարկումը և Լեռնային Ղարաբաղի հակամարտությունից տուժած մարդկանց պաշտպանությունը։ Անցյալ տարվա հոկտեմբերին Մարդու իրավունքների եվրոպական դատարանը պարտավորեցրել է Ադրբեջանին տրամադրել տեղեկատվություն 23 հայ բանտարկյալների կալանքի և առողջական պայմանների վերաբերյալ, որոնցից ութը Լեռնային Ղարաբաղում նախկին պաշտոնյաներ են։
Թարգմանությունը՝ Էմմա Չոբանյանի
