Մեր շատ առաջարկներ առ այսօր պետական տարբեր մարմիններ ընդունում են սվիններով. Հակոբյան․ ՏԵՍԱՆՅՈՒԹ

«Պլատֆորմի շատ առաջարկներ առ այսօր պետական տարբեր մարմիններ ընդունում են սվիններով»,- այս մասին ԵՄ-Հայաստան քաղաքացիական հասարակության հարթակի 8-րդ հանդիպման ժամանակ ասաց «Իրավունքի Եվրոպա միավորում» ՀԿ-ի նախագահ, ԵՄ-Հայաստան քաղհասարակության պլատֆորմի համանախագահ Լուսինե Հակոբյանը։ 

«Առաջարկում ենք կառավարությանը որդեգրել ավելի բաց մոտեցում, հրաժարվել կառավարություններին ներհատուկ պաշտպանական մարտավարությունից, և, ի վերջո, մենք բոլորս նույն կարևոր նպատակին ենք ծառայում, և այդ նպատակը մեր ժողովրդի շահն է, մեր ժողովրդի բարեկեցությունը, խաղաղությունը, անվտանգությունը, ժողովրդավարության և իրավունքի գերակայության պաշտպանությունը մեր պետությունում»,- ասաց Հակոբյանը։

Նա նշեց, որ Եվրամիություն-Հայաստան քաղհասարակության պլատֆորմը Համապարփակ և ընդլայնված գործընկերության համաձայնագրի (CEPA) 366-րդ հոդվածով ստեղծված և Եվրամիություն-Հայաստան գործընկերության ռազմավարական օրակարգով նախատեսված քաղհասարակության կառույց է, որին վերապահված է Հայաստան-Եվրամիություն գործընկերության առաջընթացը մշտադիտարկելու գործառույթ։

«Պլատֆորմը հսկայական աշխատանք է կատարել հայ ժողովրդի շրջանում Եվրոպական միության և Եվրամիություն-Հայաստան գործընկերությունն ամրապնդող փաստաթղթերի վերաբերյալ իրազեկվածության բարձրացման ուղղությամբ։ Պլատֆորմի նախաձեռնությամբ հայաստանյան քաղաքական և հասարակական գործիչներն արդեն երկու տարի անընդմեջ մայիսի 9-ին նշում են Եվրոպայի օրը։ Կարծում ենք, որ այս տարի արդեն այդ նախաձեռնությունն իր վրա պետք է վերցնի Հայաստանի Հանրապետության կառավարությունը»,- ընդգծեց Լուսինե Հակոբյանը։

Նա շեշտեց, որ պլատֆորմը նշանակալի դեր ունի Հայաստանի եվրոպական ուղու առաջմղման գործում՝ նպաստելով ԵՄ-ին անդամակցության գործընթացի մեկնարկի վերաբերյալ օրենսդրական նախաձեռնությանը։

Մանրամասները՝ տեսանյութում։