27.07.2026 | 22:59
Սևանա լճի մակարդակը հուլիսի 20-26-ը հունվարի 1-ի ցուցանիշից բարձր է 57 սմ-ով
Թրամփը պատրաստ է դադարեցնել պատերազմը՝ նույնիսկ առանց Հորմուզի նեղուցը բացելու. WSJ
Քաղաքականություն
31.03.2026 | 11:31
ԱՄՆ նախագահ Դոնալդ Թրամփն իր օգնականներին ասել է, որ պատրաստ է դադարեցնել Իրանի դեմ ռազմական արշավը, նույնիսկ եթե Հորմուզի նեղուցը մեծ մասամբ փակ մնա, և այն վերաբացելու բարդ գործողությունը թողնել ավելի ուշ ժամկետի։ Այս մասին գրում է The Wall Street Journal-ը՝ հղում անելով վարչակազմի պաշտոնյաներին, փոխանցում է DW-ն։
Ըստ WSJ-ի՝ Թրամփը և նրա օգնականները հանգել են եզրակացության, որ կարևորագույն ջրային երթուղու՝ այժմ փակուղու վերածված նեղուցի վերաբացման առաքելությունը կձգձգի հակամարտությունը։ Փոխարենը, ԱՄՆ նախագահը որոշել է կենտրոնանալ Իրանի հրթիռներին և նավատորմին հարվածելու վրա, նախքան Թեհրանի վրա դիվանագիտական ճնշում գործադրելը՝ Հորմուզի նեղուցը վերաբացելու համար։
Թրամփը և նրա թիմը կարծում են, որ Հորմուզի նեղուցը շատ ավելի կարևոր է Եվրոպայի, Մերձավոր Արևելքի և Ասիայի երկրների համար, քան Միացյալ Նահանգների։ Շաբաթներ շարունակ Վաշինգտոնի վարչակազմի պաշտոնյաները դիմել են դաշնակիցներին և գործընկերներին՝ պատրաստվել նեղուցի բացումն ապահովող բանակցությունների կամ գործողությունների։
Աշխարհի նավթի և գազի գրեթե մեկ հինգերորդն անցնում է Հորմուզի նեղուցով։
Նավթի գները տատանումներից հետո նվազել են, մինչդեռ բաժնետոմսերի մեծ մասը բարձրացել է։ WTI-ի և Brent-ի ֆյուչերսների գները նույնպես անկում են ապրել, բայց, միևնույն է, մնացել են բարելի համար 100 դոլարից զգալիորեն բարձր։
Երկուշաբթի Դոնալդ Թրամփը նաև սպառնացել էր ոչնչացնել Խարգ կղզին՝ իրանական նավթի արտահանման հիմնական կենտրոնը, եթե խաղաղության համաձայնագիր չկնքվի։ Նա հայտարարել էր, որ ԱՄՆ ուժերը կոչնչացնեն «նրանց բոլոր էլեկտրակայանները, նավթահորերը և Խարգ կղզին (հնարավոր է՝ նաև աղազերծման բոլոր կայանները)»։
Մասնագետները նշում են, որ քաղաքացիական ենթակառուցվածքների ոչնչացումը կարող է համարվել ռազմական հանցագործություն։
Թարգմանությունը՝ Էմմա Չոբանյանի
