Թրամփը սպառնում է պայթեցնել Իրանի բոլոր էլեկտրակայաններն ու նավթահորերը, ինչպես նաև Խարգ կղզին

ԱՄՆ նախագահ Դոնալդ Թրամփն հայտարարել է, որ Վաշինգտոնը «լուրջ քննարկումների» մեջ է Իրանի նոր ռեժիմի հետ, որը, նրա խոսքով, կարող է «վերջ դնել ռազմական գործողություններին Իրանում», գրում է BBC-ն։

«Ամերիկայի Միացյալ Նահանգները լուրջ քննարկումների մեջ է նոր և ավելի ողջախոհ ռեժիմի հետ՝ Իրանում մեր ռազմական գործողությունները դադարեցնելու համար։ Մեծ առաջընթաց է գրանցվել, բայց եթե որևէ պատճառով շուտով համաձայնության չհասնենք, ինչը, հավանաբար, կլինի, և եթե Հորմուզի նեղուցն անմիջապես «բաց չլինի բիզնեսի համար», մենք կավարտենք մեր հիանալի «այցը» Իրան՝ պայթեցնելով և ամբողջությամբ ոչնչացնելով նրանց բոլոր էլեկտրակայանները, նավթահորերը և Խարգ կղզին (և հնարավոր է՝ բոլոր աղազրկման կայանները), որոնց մենք միտումնավոր դեռ չենք «դիպչել»»,- Truth Social-ում գրել է Թրամփը։

Նա նշել է, որ «դա կլինի մեր բազմաթիվ զինվորների և այլոց համար հատուցում, որոնց Իրանը կոտորել և սպանել է «հին ռեժիմի 47-ամյա ահաբեկչության տիրապետության» ընթացքում»։

Անցյալ շաբաթ ԱՄՆ նախագահը հայտարարել էր, որ 10 օրով՝ մինչև ապրիլի 6-ը, կդադարեցնի Իրանի էներգետիկ ռեսուրսների վրա հարձակումները։ Բանակցություններում առաջընթացի մասին հայտարարելով՝ Վաշինգտոնը նաև լրացուցիչ ուժեր է ուղարկում տարածաշրջան։ Իրանի խորհրդարանի խոսնակը մեղադրել էր ԱՄՆ-ին հնարավոր բանակցությունների ազդանշան տալու և միաժամանակ ցամաքային ներխուժում պլանավորելու մեջ։ Իրանի առաջնորդները հերքում են, որ ուղիղ բանակցություններ են վարում ԱՄՆ-ի հետ։

Ավելի վաղ էլ Թրամփը հայտարարել էր, որ կարող է հեշտությամբ գրավել Իրանի Խարգ կղզին։

Թարգմանությունը՝ Էմմա Չոբանյանի