«Հավատարիմ հային և հողին». հայտնի է ՀՅԴ-ի նախընտրական կարգախոսը

Տասը օրից մեկնարկելու է Ազգային ժողովի արտահերթ ընտրությունների քարոզարշավը: Այս պահին կուսակցությունները և դաշինքները զբաղված են իրենց նորովի ներկայացնելու տարբերակներ որոնելով: Վերջիններս կարգախոսներն ու քարոզարշավը յուրովի սկսելու տարբերակներ են փնտրում:

Factor.am-ին հայտնի դարձավ, որ ՀՅԴ այս ընտրություններում քաղաքացիներին ներկայանալու է «Հավատարիմ հային և հողին» կարգախոսով: Այս տեղեկության վերաբերյալ Factor.am-ը մեկնաբանություն խնդրեց ՀՅԴ ԳՄ ներկայացուցիչ Արսեն Համբարձումյանից: Նա մեզ հետ զրույցում փոխանցեց, որ կարգախոսը որոշված է, բայց հրապարակման ենթակա չէ:

Այս օրերին ՀՅԴ-ում քննարկում են քարոզարշավի մեկնարկի նրբությունները: Նախորդ ընտրություններին՝ 2017 թվականին, ՀՅԴ-ն ընտրողներին ներկայացավ «Նոր սկիզբ, արդար Հայաստան» կարգախոսով և կարողացավ ԱԺ-ում ընդամենը 7 պատգամավորական մանդատ ունենալ:

Factor.am-ն արդեն տեղեկացրել էր, որ ԲՀԿ-ն ընտրողներին ներկայանալու է հին կարգախոսով՝ «Մեր խոսքը գործ է», ինչպես նաև զուգահեռաբար լինելու է «Հավատա, վստահիր, պահանջիր» կարգախոսը:

Իշխող «Քաղաքացիական պայմանագիր» կուսկացությունում որոշել էին, որ նախընտրական քարոզարշավին ներկայանալու են «Նիկոլ, վարչապետ» կարգախոսով: Այս տեղեկությունները նաև իրենց հարցազրույցներում հաստատել էին ՔՊ վարչության անդամներ, ԱԺ պատգամավորներ Ալեն Սիմոնյանն ու Հովիկ Աղազարյանը: Սակայն, կուսակցության մամուլի ծառայությունը հակասող հայտարարություններ է տարածում՝ նշելով, որ դա ընդամենը քննարկված տարբերակներից մեկն է: ՀՀԿ-ից էլ առաջարկում են սպասել ևս մի քանի օր՝ մինչև իրենց կարգախոսը պարզ կլինի:

Հայկ Վարդանյան