Նոր արգելանքներ՝ Վահե Հակոբյանի հոր ընկերության և փոխկապակցված անձանց գույքի վրա

Վերաքննիչ հակակոռուպցիոն դատարանը, դատավոր Դիանա Հովհաննիսյանի նախագահությամբ, մասնակի բավարարել է ՀՀ գլխավոր դատախազության վերաքննիչ բողոքը Սյունիքի նախկին մարզպետ, «Հայաստան» դաշինքի նախկին պատգամավոր Վահե Հակոբյանի և նրա հետ փոխկապակցված անձանց՝ ապօրինի ծագում ունեցող գույքի բռնագանձման գործով։ Factor TV-ն այս մասին տեղեկանում է «Դատալեքս» դատական-տեղեկատվական համակարգից։

Դատարանը վերացրել է Հակակոռուպցիոն դատարանի փետրվարի 6-ի որոշման այն մասերը, որոնցով մերժվել էր հայցի ապահովման միջոցի կիրառումը «ՍԵՎԵՐՈւՄ ՄԻԼԵՍ» ՍՊԸ-ի և Աննա Սեդրակյանի կողմից տրված փոխառության նկատմամբ։

Առաջին ատյանի դատարանը մասնակի բավարարել էր հայցի ապահովման միջնորդությունը, սակայն մերժել էր մի քանի պահանջ, այդ թվում՝ արգելանք դնել «ՍԵՎԵՐՈՒՍ ՄԻԼԵՍ» ՍՊԸ-ում Վահե Հակոբյանի հոր՝ Ալբերտ Հակոբյանի մասնակցության և ընկերության գույքի օտարման վրա, ինչպես նաև Աննա Սեդրակյանի կողմից Սաթենիկ Քոսյանին տրված շուրջ 19.7 մլն դրամ փոխառության պահանջի իրավունքի տնօրինման արգելք սահմանել։

Վերաքննիչ դատարանը, քննելով դատախազության բողոքը, գտել է, որ առաջին ատյանի դատարանը պատշաճ չի գնահատել հայցի ապահովման միջոց չկիրառելու ռիսկերը։ Որոշման մեջ, մասնավորապես, նշվում է. «Հաշվի առնելով, որ այս գործով ներկայացված հայցի առարկան իր մեջ ներառում է նաև «ՍԵՎԵՐՈՒՍ ՄԻԼԵՍ» ՍՊԸ-ում Ալբերտ Հակոբյանի մասնակցությունը որպես ապօրինի ծագում ունեցող գույք ամբողջությամբ բռնագանձելու պահանջ՝ հայցվորի կողմից ներկայացված ձևով հայցի ապահովման միջոց չկիրառելը կարող է հետագայում անհնար դարձնել կամ դժվարացնել այդ մասնակցության՝ որպես գույքի, բռնագանձման մասով դատական ակտի կատարումը, քանի որ պատասխանողն ազատ կլինի իր բաժնեմասի տնօրինման հարցում, իսկ ընկերության կողմից իր գույքերի ազատ տնօրինման պայմաններում էլ կարող է նվազել իրավաբանական անձի իրական արժեքը»։

Անդրադառնալով Աննա Սեդրակյանի կողմից տրված փոխառությանը՝ Վերաքննիչ դատարանը նշել է, որ հայցի ապահովման միջոցի կիրառման անհրաժեշտության ապացուցման շեմն ավելի ցածր է, և դատարանի մոտ պետք է ձևավորվի «ողջամիտ կասկած» դատական ակտի կատարման հնարավոր դժվարությունների վերաբերյալ։

«Այս առումով իրավաչափ է դատախազության փաստարկն առ այն, որ 19.784.960 ՀՀ դրամի չափով փոխառության պահանջի իրավունքի առկայությունը և հայցադիմումով նշված պահանջի մասով հիմնավորվածության վերջնական գնահատականը կարող է տրվել միայն գործով դատական քննության ընթացքում», – ասված է որոշման մեջ։

Արդյունքում, Վերաքննիչ դատարանը վերացրել է առաջին ատյանի դատարանի որոշման վիճարկվող մասերը և կայացրել նոր դատական ակտ, որով՝ արգելվել է Ալբերտ Հակոբյանին «ՍԵՎԵՐՈՒՍ ՄԻԼԵՍ» ՍՊԸ-ում ունեցած իր մասնակցության տնօրինումը, ընկերությանը պատկանող անշարժ և շարժական գույքերի (բացառությամբ շրջանառու միջոցների) օտարման հետ կապված որևէ գործողություն կատարել։

Բացի այդ, արգելվել է Աննա Սեդրակյանին տնօրինել Սաթենիկ Քոսյանին տրված փոխառության չվերադարձված մասի՝ 19,784,960 ՀՀ դրամի պահանջի իրավունքը։ Միևնույն ժամանակ, Վերաքննիչ դատարանն ուժի մեջ է թողել առաջին ատյանի դատարանի որոշման այն մասը, որով մերժվել էր հայցի ապահովման միջոց կիրառել փոխառությունների գումարի ամբողջական կամ մասնակի վերադարձի դեպքում այդ գումարների և տոկոսների նկատմամբ։

Հիշեցնենք՝ հայցագնի՝ 7 միլիարդ 339 միլիոն 743 հազար 581 դրամի չափով արգելանք է դրվել Վահե Հակոբյանին և նրա կնոջ՝ Էլիզաբեթ Պետրոսյանին պատկանող բոլոր գույքերի վրա:

Եվգենյա Համբարձումյան