Ադրբեջանում գերեվարված Կարեն Ղազարյանի նկատմամբ վատ վերաբերմունքի դրսևորման վտանգ կա․ Արման Թաթոյան

Հայաստանի մարդու իրավունքների պաշտպան Արման Թաթոյանը ակտիվ մասնակցում է ադրբեջանական գերության մեջ հայտնված Կարեն Ղազարյանի ճակատագրի հետ կապված գործընթացին: Այս մասին այսօր հրավիրված քննարկման ժամանակ ասաց ՄԻՊ Արման Թաթոյանը։

«Կարեն Ղազարյանի` Ադրբեջանի տարածքում գերեվարվելուց անմիջապես հետո մենք նույնպես ներգրավվել ենք գործընթացում, որովհետև մեզ դիմել էին Կարեն Ղազարյանի ազգականները: Մենք մի քանի անգամ իրենց հետ քննարկումներ ենք ունեցել: Վերջերս ծնողներից նորից ստացանք բողոք, անհանգստություն, որ իրենք ունեն ոչ բավարար տեղեկություններ իրենց որդու` Կարեն Ղազարյանի մասին: Դա առիթ հանդիսացավ, որ ես արդեն ուղղակիորեն դիմեի Եվրոպայի խորհրդի մարդու իրավունքների հանձնակատարին, ՄԱԿ-ի հանձնակատարին, հիմա մենք սպասում ենք արձագանքների: Ընդհանուր առմամբ մեզ մոտ նույնպես կա այդ մտահոգությունը, որ կա նրա նկատմամբ վատ վերաբերմունքի դրսևորման վտանգը»,- ասաց Մարդու իրավունքների պաշտպանը:

Վերջինս նշեց, որ Ադրբեջանի կողմից Կարեն Ղազարյանը ներկայացվում է որպես դիվերսանտ, զինվորական, բայց, բնականաբար, այն փաստաթղթերը, որոնք հայկական կողմն ունի և ներկայացրել է միջազգային կառույցներին, այլ բան են փաստում։

«Դրանք փաստում են, որ իրականում Կարեն Ղազարյանը քաղաքացիական անձ է, երբևէ չի ծառայել Զինված ուժերում, ավելին` նաև առողջական վիճակի հետ կապված եղել են որոշակի խնդիրներ: Քանի որ տեղեկությունը հրապարակային է, կարող եմ ասել նաև, որ հարցը վերաբերում էր նաև հոգեկան առողջությանը»,-ասաց Թաթոյանը՝ նշելով, որ ինքը տեղեկություն ունի, որ փաստաբանների կողմից միջազգային որոշակի գործընթաց է նախաձեռնված այս հացով։