13.05.2026 | 14:12
Երևանում կասեցվել է «Պիցցա Տաշիր»-ի սննդի կետերից մեկի արտադրական գործունեությունը
Հայաստանը ԵՄ մտերիմ գործընկերն է, սպասում ենք հարաբերությունների խորացմանը. Անտոնիո Կոշտա
Քաղաքականություն
27.03.2026 | 10:48
Եվրոպական խորհրդի նախագահ Անտոնիո Կոստան, Եվրոպական հանձնաժողովի նախագահ Ուրսուլա ֆոն դեր Լեյենի հետ միասին, կներկայացնեն ԵՄ-ն 2026 թվականի մայիսի 4-ին և 5-ին Երևանում կայանալիք ԵՄ-Հայաստան գագաթնաժողովում: Հայաստանը կներկայացնի վարչապետ Նիկոլ Փաշինյանը: Այս մաաին ասվում է Եվրահանձնաժողովի հայտարարության մեջ։
Գագաթնաժողովից առաջ Կոշտան և ֆոն դեր Լեյենը կմասնակցեն Եվրոպական քաղաքական համայնքի հանդիպմանը, որը տեղի կունենա 2026 թվականի մայիսի 4-ին Երևանում։
Նշվում է, որ ԵՄ-ՀՀ գագաթնաժողովը կկենտրոնանա երկկողմ հարաբերությունների ամրապնդման վրա, մասնավորապես, էներգետիկայի, տրանսպորտի և թվային տեխնոլոգիաների ոլորտում։ Առաջնորդները կքննարկեն նաև Հարավային Կովկասում խաղաղության, անվտանգության, կապի և բարգավաճման ապահովման հետ կապված առաջընթացը, ինչպես նաև ներկայիս համաշխարհային մարտահրավերները, այդ թվում՝ Մերձավոր Արևելքում և Ուկրաինայում տեղի ունեցող վերջին զարգացումները։
«Հայաստանը ԵՄ մտերիմ գործընկերն է, և մենք անհամբեր սպասում ենք այս հարաբերությունների խորացմանը մեր առաջին գագաթնաժողովի միջոցով։ Միավորված լինելով ընդհանուր արժեքներով, միջազգային իրավունքի և կանոնների վրա հիմնված միջազգային կարգի նկատմամբ նվիրվածությամբ՝ այս կարևոր իրադարձությունը կնշանակի կարևոր ներդրում Հարավային Կովկասում խաղաղության, անվտանգության, կապի և բարգավաճման գործում»,- նշել է Կոշտան։
Հայտարարության մեջ ընդգծվում է, որ ԵՄ-ՀՀ գագաթնաժողովն արտացոլում է երկկողմ գործընկերության աճող դինամիկան վերջին տարիների ընթացքում։
ԵՄ-ի և Հայաստանի հարաբերությունները հիմնված են 2021 թվականից ուժի մեջ գտնվող ԵՄ-ՀՀ համապարփակ և ընդլայնված գործընկերության համաձայնագրի (CEPA) և 2025 թվականին համաձայնեցված ԵՄ-ՀՀ գործընկերության ռազմավարական օրակարգի վրա։
ԵՄ-ն Հայաստանի բարեփոխումների օրակարգի, ինչպես նաև առևտրի և ներդրումների համար առանցքային գործընկերն է։ Այն նաև երկրի ամենամեծ դոնորն է։ 2023 թվականի հոկտեմբերի իր եզրակացություններում Եվրոպական խորհուրդը հանձնարարել է ԵՄ ինստիտուտներին «ամրապնդել ԵՄ-ՀՀ հարաբերությունները բոլոր ուղղություններով»։
Թարգմանությունը՝ Էմմա Չոբանյանի
