Քաղաքականություն
26.03.2026 | 18:19
Իրանի խորհրդարանի խոսնակ Մոհամմադ Բաղեր Ղալիբաֆը զգուշացրել է իրանական կղզի հնարավոր ներխուժման մասին՝ անանուն տարածաշրջանային երկրի աջակցությամբ, հաղորդում է France24-ը։
«Հետախուզական որոշ հաղորդագրությունների հիման վրա՝ Իրանի թշնամիները պատրաստվում են գրավել իրանական կղզիներից մեկը՝ տարածաշրջանային պետություններից մեկի աջակցությամբ։ Մեր ուժերը հետևում են թշնամու բոլոր շարժումներին, և եթե նրանք որևէ քայլ ձեռնարկեն, այդ տարածաշրջանային պետության բոլոր կենսական ենթակառուցվածքները կենթարկվեն անդադար հարձակումների»,- գրել է Ղալիբաֆը X-ում գրառման մեջ։
Այս նախազգուշացումը հնչում է այն ժամանակ, երբ Միացյալ Նահանգների նախագահ Դոնալդ Թրամփը շարունակում է պնդել, որ ԱՄՆ-ը բանակցություններ է վարում Իրանի հետ պատերազմը դադարեցնելու համար, ինչը Թեհրանը հերքում է, մինչդեռ Սպիտակ տունը նույնպես նոր սպառնալիքներ է հնչեցրել Իրանի ղեկավարության հասցեին։ Սպիտակ տան մամուլի քարտուղար Քարոլայն Լիվիթը հայտարարել է, որ Իրանը պետք է ընդունի պարտությունը։
«Եթե Իրանը չկարողանա ընդունել ներկայիս պահի իրականությունը, եթե նրանք չկարողանան հասկանալ, որ իրենք ռազմական պարտություն են կրել և կշարունակեն պարտվել, նախագահ Թրամփը կհամոզվի, որ նրանք ավելի ուժեղ հարված կստանան, քան երբևէ։ Նախագահ Թրամփը պատրաստ է դժոխք ստեղծել»,- ասել է Լիվիթը։
Վաշինգտոնի կողմից խաղաղ բանակցությունների մասին պնդումները, միաժամանակ Իրանի դեմ ավելի ու ավելի պատժիչ պատերազմով սպառնալով, տեղի են ունենում այն ժամանակ, երբ Պենտագոնը հազարավոր օդադեսանտային զորքեր է ուղարկում Պարսից ծոցի տարածաշրջան՝ ավելացնելով ԱՄՆ ծովային հետևակի երկու զորակազմին, որոնք արդեն ճանապարհին են։
Ավելի վաղ լրատվամիջոցները հաղորդել էին, որ ԱՄՆ Պատերազմի նախարարությունը նախատեսում է լրացուցիչ զորքեր տեղակայել Մերձավոր Արևելքում՝ Իրանում գործողություններին աջակցելու համար։
Թարգմանությունը՝ Էմմա Չոբանյանի
