Պենտագոնը Մերձավոր Արևելք լրացուցիչ հազարավոր զինվորների կուղարկի. ԶԼՄ-ներ

ԱՄՆ Պատերազմի նախարարությունը նախատեսում է ևս շուրջ 3000 զինվորականի ուղարկել Մերձավոր Արևելք՝ Իրանում գործողություններին աջակցելու համար։ Այս մասին հայտնել են The Wall Street Journal-ի կողմից մեջբերված երկու պաշտոնյաներ, գրում է DW-ն։

Reuters-ը նույնպես հաղորդել է, որ սպասվում է հազարավոր զինվորների տեղակայում, հղում անելով թեմային ծանոթ երկու անձանց։

Զորքերը կներգրավվեն բանակի 82-րդ օդադեսանտային դիվիզիայից՝Airborne Division, որը հայտնի է աշխարհի ցանկացած վայրում արագ տեղակայվելու իր ունակությամբ։ Պաշտոնյաները չեն նշել, թե Մերձավոր Արևելքի որ մասում են տեղակայվելու զորքերը կամ երբ են ժամանելու։

82-րդ օդադեսանտային դիվիզիան տեղակայված է Ֆորտ Բրեգում՝ Հյուսիսային Կարոլինայում, և մասնագիտացած է «թշնամական կամ վիճելի տարածքներ պարաշյուտով թռիչքների մեջ՝ ցամաքը պաշտպանելու համար»։ Պաշտոնյաները WSJ-ին և Reuters-ին ասել են, որ Իրանում զորքեր տեղակայելու որոշում դեռևս չի կայացվել։

Սակայն ռազմական ներկայությունը կարող է ԱՄՆ նախագահ Դոնալդ Թրամփին ապագա գործողությունների տարբերակներ տալ, ինչպիսիք են Հորմուզի նեղուցի ուժով վերաբացումը կամ Իրանի ռազմավարական կղզիների գրավումը, հաղորդում է WSJ-ն։

Հաղորդվում է նաև, որ ԱՄՆ զինված ուժերը պատրաստվում են առաջիկա օրերին Մերձավոր Արևելքում տեղակայել առնվազն 1000 զինծառայող 82-րդ օդադեսանտային դիվիզիայից, ըստ ծրագրերի մասին տեղյակ երեք անձանց։ Ըստ աղբյուրների` զորակազմի մեջ կլինեն 1-ին բրիգադի մարտական ​​​​խմբի գումարտակը, դիվիզիայի շտաբը, ինչպես նաև դիվիզիայի հրամանատար, գեներալ-մայոր Բրենդոն Թեգտմայերը:

Անցյալ շաբաթ ԱՄՆ-ը տարածաշրջանում տեղակայել է 2500 ծովային հետևակի և նավաստիների՝ USS Boxer դեսանտային հարձակողական նավի վրա։ The New York Times-ը երկուշաբթի առաջինն էր հաղորդել, որ Թրամփի վարչակազմը քննարկում է 82-րդ օդադեսանտային դիվիզիայի հնարավոր տեղակայման հարցը։

Թարգմանությունը՝ Էմմա Չոբանյանի