26.03.2026 | 12:55
Առուշ Առուշանյանին ազգի դավաճան էիք սարքել, ինչ ա՝ վարչապետի հետ Գորիսի փողոցներով էր շրջում․ Թունյան. ՏԵՍԱՆՅՈՒԹ
Միջնորդների միջոցով մեսիջների փոխանակումը չի նշանակում բանակցություններ ԱՄՆ-ի հետ. Արաղչի
Քաղաքականություն
26.03.2026 | 11:16
Իրանը քննարկում է պատերազմը դադարեցնելու՝ ԱՄՆ-ի առաջարկը, բայց մտադիր չէ բանակցություններ վարել Մերձավոր Արևելքում սրվող հակամարտության լուծման շուրջ, հայտարարել է երկրի արտաքին գործերի նախարար Աբբաս Արաղչին։ Այնուամենայնիվ, միջնորդների միջոցով հաղորդագրությունների փոխանակումը «չի նշանակում բանակցություններ ԱՄՆ-ի հետ», պետական հեռուստատեսությանը ասել է նա։
«Նրանք իրենց գաղափարները ներկայացրել են իրենց մեսիջներում, որոնք փոխանցվել են բարձրաստիճան պաշտոնյաներին և, անհրաժեշտության դեպքում, կհայտարարեն իրենց դիրքորոշումը»,- ասել է Արաղչին։
Նշենք, որ ԱՄՆ նախագահ Դոնալդ Թրամփի 15 կետից բաղկացած առաջարկը, որը Թեհրանին ուղարկվել է Պակիստանի միջոցով, կոչ է անում երկրից դուրս բերել Իրանի բարձր հարստացված ուրանի պաշարները, դադարեցնել հարստացումը, սահմանափակել նրա բալիստիկ հրթիռների ծրագիրը և կրճատել տարածաշրջանային դաշնակիցների ֆինանսավորումը։
Արաղչին հայտարարել է, որ Իրանը չի ծրագրում բանակցել Միացյալ Նահանգների հետ, և որ Թեհրանը մտադիր է շարունակել պայքարը, այն բանից հետո, երբ Թրամփը հայտարարել է, որ Վաշինգտոնն առաջարկել է խաղաղության ծրագիր։
«Ներկայում մեր քաղաքականությունը դիմադրության շարունակությունն է։ Մենք մտադիր չենք բանակցություններ վարել. մինչ այժմ բանակցություններ չեն տեղի ունեցել, և ես կարծում եմ, որ մեր դիրքորոշումը լիովին սկզբունքային է։ Հիմա բանակցությունների մասին խոսելը պարտության խոստովանություն է»,- ասել է Արաղչին։
Արաղչին որոշ երկրների արտգործնախարարների և առաջնորդների կողմից հեռախոսազրույցների ընթացքում ներկայացված հրադադարի առաջարկներն անվանում է անբավարար՝ պնդելով, որ դրանք միայն կստեղծեն կրկնվող հակամարտությունների ցիկլ։ Նա հավելել է, որ Իրանը հայտնել է իր դիրքորոշումը այս շփումների ժամանակ։ Ըստ նրա՝ Իրանը զգուշացրել է բոլոր երկրներին, որ Հորմուզի նեղուցում ցանկացած ռազմական ներկայություն կհանգեցնի լարվածության սրմանը։ Արաղչին ընդգծել է, որ ջրային այս ուղին Իրանի տարածքային վերահսկողության և ինքնիշխանության ներքո է։
«Նեղուցը փակ չէ։ Այն փակ է միայն թշնամիների և նրանց դաշնակիցների համար»,- շեշտել է նա։
Նավերը ներկայում չեն կարողանում անցնել նեղուցը, հիմնականում՝ պատերազմական պայմաններում ապահովագրական սահմանափակումների պատճառով, ընդգծել է Արաղչին։ Որոշ երկրներ կապ են հաստատել Իրանի հետ՝ տարանցիկ թույլտվություն ստանալու համար, և որոշակի անցումներ հաստատվել են։
Չինաստանից, Ռուսաստանից, Իրաքից, Պակիստանից, Հնդկաստանից և Բանգլադեշից նավերին թույլատրվել է անցնել և, ըստ Արաղչիի, այս պայմանավորվածությունը կշարունակվի պատերազմից հետո։
Մեկնաբանելով ԱՄՆ-ի կողմից Իրանի ենթակառուցվածքներին հարված հասցնելու սպառնալիքները՝ Արաղչին ասել է, որ զինված ուժերը նախազգուշացումներ են տվել, որ նման գործողությունները կարող են հանգեցնել ծանր հետևանքների: Նա նաև ասել է, որ պատերազմի արժեքը կրում են թե՛ ամերիկյան հանրությունը, թե՛ տարածաշրջանի ժողովուրդները։
Արաղչին քննադատել է եվրոպական երկրներին՝ ասելով, որ նրանք սկզբունքորեն դեմ են պատերազմին, բայց չեն ձեռնարկել կոնկրետ քայլեր Իրանի վրա հարձակումները դատապարտելու համար՝ հավելելով, որ դա ցույց է տալիս, որ նրանք որոշիչ դերակատար չեն միջազգային ասպարեզում։ Արաղչին նաև հայտարարել է, որ Թեհրանը ցանկանում է պատերազմն ավարտել իր սեփական պայմաններով, և այնպես, որ ապահովվի հետագայում պատերազմի բացակայությունը։
Թարգմանությունը՝ Էմմա Չոբանյանի
