Թրամփը հայտարարել է, թե Իրանի բանակցողները վախենում են՝ «սեփական ժողովուրդը կսպանի իրենց»

ԱՄՆ նախագահ Դոնալդ Թրամփը չորեքշաբթի պնդել է, որ Իրանը մասնակցում է խաղաղության բանակցություններին՝ ենթադրություն հայտնելով, որ Թեհրանի հերքումները պայմանավորված են այն հանգամանքով, որ իրանցի բանակցողները վախենում են, որ կսպանվեն սեփական կողմից, գրում է AFP-ը, որին հղում է անում Al Arabiya-ն։

«Ի դեպ, նրանք բանակցություններ են վարում և շատ են ուզում գործարք կնքել։ Բայց նրանք վախենում են դա ասել, քանի որ կարծում են, որ իրենց կսպանի սեփական ժողովուրդը։ Նրանք նաև վախենում են, որ մեր կողմից կսպանվեն»,- ասել է Թրամփը Կոնգրեսի հանրապետական ​​անդամների համար կազմակերպված ընթրիքի ժամանակ։

ԱՄՆ նախագահի մեկնաբանությունները հնչում են այն բանից հետո, երբ Իրանի արտգործնախարար Աբբաս Արաղչին հայտարարեց՝ «մտադիր չեն բանակցել»։

Թրամփը կրկնել է իր պնդումը, որ Իրանը «պարտվել է» հակամարտությունում, որն արդեն չորրորդ շաբաթն է ընթանում, չնայած Թեհրանը դեռևս արդյունավետորեն վերահսկում է Հորմուզի նեղուցով անցնող կարևորագույն նավթային ուղին։

Հարձակվելով իր ներքին հակառակորդների վրա՝ Թրամփը նաև պնդել է, որ դեմոկրատները փորձում են «շեղվել այս ռազմական գործողության ընթացքում ունեցած բոլոր հսկայական հաջողություններից»։

«Նրանց դուր չի գալիս «պատերազմ» բառը, քանի որ ենթադրվում է, որ պետք է ստանաք հավանություն, ուստի ես կօգտագործեմ «ռազմական գործողություն» բառը»,- անդրադառնալով հակամարտության համար Կոնգրեսի հավանությունը ստանալու դեմոկրատների կոչերին՝ ասել է Թրամփը։

Չորեքշաբթի ավելի վաղ Սպիտակ տունը զգուշացրել էր, որ Թրամփը պատրաստ է «դժոխք ստեղծել», եթե Իրանը չընդունի Մերձավոր Արևելքում պատերազմը դադարեցնելու գործարքը՝ հավելելով, որ բանակցությունները շարունակվում են՝ չնայած հաղորդագրություններին, որ Թեհրանը մերժել է ԱՄՆ-ի առաջարկած խաղաղության ծրագիրը:

«Եթե Իրանը չընդունի ներկայիս իրականությունը, Թրամփը կապահովի, որ նրանք ավելի ուժեղ հարված ստանան, քան երբևէ։ Նախագահ Թրամփը պատրաստ է դժոխք ստեղծել։ Իրանը չպետք է կրկին սխալ հաշվարկներ կատարի»,- ճեպազրույցի ժամանակ ասել է մամուլի քարտուղար Քարոլայն Լիվիթը՝ հավելելով, որ «բանակցությունները շարունակվում են»։

Իրանի պետական ​​լրատվամիջոցներն ավելի վաղ, հղում անելով անանուն պաշտոնյայի, հայտարարել էին, որ Իսլամական Հանրապետությունը «բացասական» է պատասխանել Վաշինգտոնի կողմից ներկայացված 15 կետանոց ծրագրին։

Թարգմանությունը՝ Էմմա Չոբանյանի