24.04.2026 | 09:35
Փաշինյանն ու բարձրաստիճան այլ պաշտոնյաներ հարգանքի տուրք մատուցեցին Հայոց ցեղասպանության զոհերի հիշատակին․ ՏԵՍԱՆՅՈՒԹ
Իրանի և ԱՄՆ-ի միջև բանակցություններ կամ քննարկումներ չկան. Իրանի ԱԳՆ
Քաղաքականություն
25.03.2026 | 14:41
Իրանի արտաքին գործերի նախարարության խոսնակ Էսմայիլ Բաղային India Today-ին տված մեկնաբանություններում կրկին հերքել է ԱՄՆ-ի և Իրանի միջև բանակցությունների մասին պնդումը։
«Մենք երեկ հստակեցրել ենք, որ Իրանի և Միացյալ Նահանգների միջև քննարկումներ կամ բանակցություններ չկան։ Պետք է ասեմ, որ շատ աղետալի փորձառություն ենք ունեցել Միացյալ Նահանգների դիվանագիտության հետ կապված»,- ասել է նա՝ հավելելով, որ Իրանը հարձակման է ենթարկվել «ինը ամսվա ընթացքում երկու անգամ, երբ մենք գտնվում էինք միջուկային խնդիրը լուծելու բանակցային գործընթացի կենտրոնում»։
Բաղային նշում է, որ Իրանը չի կարող «վստահել Միացյալ Նահանգների դիվանագիտությանը»։
«Նայեք փաստերին։ Իրանը գտնվում է ԱՄՆ-ի և Իսրայելի կողմից անընդհատ ռմբակոծությունների և հրթիռային հարվածների տակ։ Այսպիսով, նրանց դիվանագիտության և միջնորդության մասին պնդումը հավաստի չէ, որովհետև նրանք են սկսել այս պատերազմը և շարունակում են հարձակվել Իրանի վրա»,- հայտարարել է նա։
Պակիստանում Իրանի դեսպանը, իր հերթին, հայտարարել է, որ Վաշինգտոնի և Թեհրանի միջև բանակցություններ չեն եղել, այն բանից հետո, երբ ԱՄՆ նախագահ Դոնալդ Թրամփն ազդարարեց պատերազմը դադարեցնելու դիվանագիտական ջանքերում որոշակի առաջընթացի մասին։
«Մենք նման մանրամասներ լսել ենք նաև լրատվամիջոցներից, բայց, իմ տեղեկություններով և Թրամփի պնդումներին հակառակ, մինչ այժմ երկու երկրների միջև որևէ բանակցություն՝ ուղղակի կամ անուղղակի, տեղի չի ունեցել»,- ասել է դեսպան Ռեզա Ամիրի Մոգադամը՝ հավելելով, որ «բնական է, որ բարեկամ երկրները միշտ խորհրդակցություններ են անցկացնում երկու կողմերի հետ՝ այս անօրինական ագրեսիան դադարեցնելու համար»։
Թարգմանությունը՝ Էմմա Չոբանյանի
