Քաղաքականություն
25.03.2026 | 18:43
Արտասահմանյան անօդաչու թռչող սարքը բախվել է Էստոնիայի հյուսիս-արևելքում գտնվող Օվերի էլեկտրակայանի ծխնելույզին, հաղորդում է Delfi-ն՝ հղում անելով Էստոնիայի ոստիկանության անվտանգության դեպարտամենտին, գրում է BBC-ի ռուսական ծառայությունը։
Իրավապահ մարմինների տվյալներով՝ միջադեպը տեղի է ունեցել մարտի 25-ին, գիշերը ժամը 3:43-ին։ Ոչ ոք չի տուժել։ Էներգետիկները հայտնել են, որ կայանն էական վնասներ չի կրել, միջադեպը չի ազդել էլեկտրացանցի վրա։
Հրապարակման համաձայն՝ անօդաչու թռչող սարքը Էստոնիայի օդային տարածք է մտել Ռուսաստանից։
«Ըստ առկա տեղեկությունների՝ անօդաչու թռչող սարքն ուղղված չէր Էստոնիային։ Այժմ ընթանում են նախնական քայլեր, հետաքննությունը կպարզաբանի ճշգրիտ հանգամանքները»,- ասել է Էստոնիայի գլխավոր դատախազ Աստրիդ Ասիին։
Չորեքշաբթի ավելի վաղ Լատվիայի Պաշտպանության նախարարությունը հայտնել էր, որ Ռուսաստանից Լատվիայի օդային տարածք է մտել անօդաչու թռչող սարք։ Բեկորները հայտնաբերվել են երկրի հարավ-արևելքում գտնվող Կրասլավա քաղաքի մոտակայքում՝ Բելառուսի հետ սահմանի մոտ։ Ոչ ոք չի տուժել։
Լատվիայի վարչապետ Էվիկա Սիլինյան հայտարարել է, որ «առաջին հայացքից թվում է, թե Լատվիայում ընկած անօդաչուն կարող էր ուկրաինական լինել»։ Նա նշել է, որ նախորդ երեկոյան Ուկրաինան ենթարկվել է Ռուսաստանի ամենամեծ հարձակումներից մեկին և ընդգծել, որ Կիևը պատասխանում է, ինչը զգացվել է նաև Ռուսաստանին սահմանակից Լատվիայում։
Երկուշաբթի էլ Լիտվայի իշխանություններն էին հայտնել անօդաչու թռչող սարքի կողմից օդային տարածքի խախտման մասին: Ավելի ուշ հայտարարվել էր, որ անօդաչուն ուկրաինական է եղել և նախատեսված էր Ռուսաստանին հարվածելու համար։
Թարգմանությունը՝ Էմմա Չոբանյանի
