02.07.2026 | 18:10
ԵՀ նախագահը մեկնեց Երևանից // Պետական գաղտնիքի հրապարակման գործով գնդապետ է ձերբակալվել․ ԼՈՒՐԵՐ
Իրանի գերագույն առաջնորդը համաձայնություն է տվել ԱՄՆ-ի հետ բանակցություններին. Ynet
Քաղաքականություն
24.03.2026 | 17:11
ԱՄՆ նախագահի հատուկ բանագնաց Սթիվ Ուիթկոֆի հետ հեռախոսազրույցի ժամանակ Իրանի արտաքին գործերի նախարար Աբբաս Արաղչին հայտարարել է, որ գերագույն առաջնորդ Մոջթաբա Խամենեին հավանություն է տվել Վաշինգտոնի հետ բանակցություններին: Այս մասին հաղորդել է իսրայելական Ynet-ը՝ հղում անելով իրանցի բարձրաստիճան պաշտոնյայի, գրում է Meduza-ն։
Ըստ Ynet-ի՝ Ուիթկոֆի և Արաղչիի միջև զրույցը տեղի է ունեցել անցյալ հինգշաբթի՝ մարտի 19-ին: Իսրայելը տեղեկացված չի եղել Վաշինգտոնի և Թեհրանի միջև ուղիղ շփումների մասին:
Աղբյուրը նշել է, որ Արաղչիի համար կարևոր էր «ԱՄՆ-ին ցույց տալ Իրանում իշխանության կարգը», իսկ ամերիկացիների համար՝ իմանալ, որ նախարարը ներկայացնում է Իրանում իշխանության գլուխ կանգնածներին։
Զրույցի ընթացքում Արաղչին հայտարարել է, որ Խամենեին պատրաստ է պատերազմի արագ ավարտին, բայց միայն այն դեպքում, եթե Թեհրանի պայմանները կատարվեն։ Ynet-ը նշում է, որ սրանք մոտավորապես նույն պայմաններն են, որոնք Թեհրանն ու Վաշինգտոնը քննարկել են պատերազմից առաջ Ժնևում կայացած բանակցությունների ժամանակ։ Մասնավորապես, Իրանը պատրաստ է քննարկել հարստացված ուրանը Ռուսաստան տանելուն, բայց պատրաստ չէ ամբողջությամբ հրաժարվել իր միջուկային ծրագրից և բալիստիկ հրթիռներից։
Մարտի 23-ին ԱՄՆ նախագահ Դոնալդ Թրամփը խոսել էր Վաշինգտոնի և Թեհրանի միջև բանակցությունների մասին՝ դրանք անվանելով «շատ լավ և արդյունավետ»։ Նա հանձնարարել էր Պենտագոնին հինգ օրով հետաձգել Իրանի էլեկտրակայանների և էներգետիկ ենթակառուցվածքների վրա հարվածները։
Իրանը հերքում է ԱՄՆ-ի հետ որևէ բանակցություն վարելու մասին տեղեկությունները։
Axios-ը, հղում անելով աղբյուրին, հաղորդել է, որ Վաշինգտոնի և Թեհրանի միջև բանակցություններում որպես միջնորդներ հանդես են եկել Թուրքիան, Եգիպտոսը և Պակիստանը։ Երկու օրվա ընթացքում այս երեք երկրների արտաքին գործերի նախարարները առանձին բանակցություններ են վարել ամերիկյան և իրանական կողմերի հետ։
Թարգմանությունը՝ Էմմա Չոբանյանի
