13.05.2026 | 14:12
Երևանում կասեցվել է «Պիցցա Տաշիր»-ի սննդի կետերից մեկի արտադրական գործունեությունը
Պաշտոնյաների ազդեցությունը՝ վերահսկողության տակ․ գնումների համակարգում ներդրվում են շահերի բախման 3 մակարդակ և խիստ սահմանափակումներ
Քաղաքականություն
24.03.2026 | 15:19
Գնումների համակարգում շահերի բախման գործող մեխանիզմը այլևս չի սահմանափակվի միայն ինքնաբացարկով․ Կառավարությունն առաջարկում է ներդնել ազդեցության երեք մակարդակ, որոնք էապես խստացնում են բարձր պաշտոնյաների հետ կապված կազմակերպությունների մասնակցությունը մրցույթներին։
Ազգային ժողովի տարածած հաղորդագրությունը՝ ստորև․
«Գործող օրենսդրությամբ գնումների համակարգում շահերի բախումը կարգավորվում է հետեւյալ ընթացակարգով. երբ գնահատող հանձնաժողովներում ներառված անձինք ունենում են շահերի բախում մասնակիցների հետ, ինքնաբացարկ են հայտարարում, դուրս են գալիս գնահատող հանձնաժողովից, եւ դրանով շահերի բախումը համարվում է լուծված: Կան պաշտոնյաներ եւ պաշտոններ, որոնք միայն պաշտոն զբաղեցնելու փաստով բավարար ազդեցություն ունեն համակարգի վրա եւ գնահատող հանձնաժողովից դուրս գալու դեպքում անգամ հնարավոր չէ պնդել, որ այդ շահերի բախումը եւ ազդեցությունը համակարգի վրա վերացել է:
Այս մասին հայտնել է ՀՀ ֆինանսների նախարարի տեղակալ Ավագ Ավանեսյանը՝ ԱԺ նիստում առաջին ընթերցմամբ քննարկման ներկայացնելով «Գնումների մասին» եւ կից օրենքներում առաջարկվող փոփոխությունները եւ լրացումները:
Առաջարկվում է համակարգը փոփոխել եւ սահմանել ազդեցության 3 լրացուցիչ մակարդակ ու սահմանափակումներ կիրառել այդ մակարդակներում ներառված պաշտոնյաների նկատմամբ:
Առաջին մակարդակում ներառվող պաշտոնատար անձանց հետ շահերի բախում ունեցող կազմակերպությունները չեն կարող մասնակցել գնման գործընթացներին: Այս մակարդակում պարտադիր ներառվում են Հանրապետության նախագահը, Ազգային ժողովի նախագահը, վարչապետը, փոխվարչապետները, Ֆինանսների նախարարը եւ վերջինիս այն տեղակալը, որը համակարգում է գնումների քաղաքականության մշակման աշխատանքները:
Երկրորդ մակարդակում ներառվող պաշտոնատար անձանց հետ շահերի բախում ունեցող կազմակերպությունները չեն կարող մասնակցել տվյալ պատվիրատուի եւ վերջինիս կառավարմանը հանձնված առեւտրային եւ ոչ առեւտրային կազմակերպությունների կողմից կազմակերպվող գնման գործընթացներին: Այս մակարդակում պարտադիր ներառվում են վարչական եւ քաղաքական պաշտոն զբաղեցնող անձինք (բացառությամբ Ազգային ժողովի պատգամավորների եւ համայնքի ղեկավար չհանդիսացող ավագանու անդամների), գլխավոր դատախազը եւ նրա տեղակալները, քննչական մարմինների ղեկավարներն ու նրանց տեղակալները, գլխավոր քարտուղարները:
Երրորդ մակարդակում ներառվող պաշտոնատար անձանց հետ շահերի բախում ունեցող կազմակերպությունները չեն կարող մասնակցել տվյալ պատվիրատուի կողմից կազմակերպվող գնման գործընթացներին: Ազդեցության այս մակարդակում պարտադիր ներառվում են անկախ պետական մարմինների եւ ինքնավար մարմինների անդամները, այդ թվում՝ Կենտրոնական բանկի նախագահը եւ նրա տեղակալները, Մարդու իրավունքների պաշտպանը:
Հարակից զեկույցում Տնտեսական հարցերի մշտական հանձնաժողովի դրական եզրակացության մասին հայտնել է Ալեքսանդր Ավետիսյանը»:
