26.10.2026 | 09:52
«Ռեալը» հաղթել է «Բարսելոնային» Մբապեի դուբլի շնորհիվ. ՏԵՍԱՆՅՈՒԹ
Մարկ Ցուկերբերգն անձնական ԱԲ գործակալ է ստեղծում, որը նրան օգնելու է աշխատանքում. WSJ
Հաղորդաշարեր
24.03.2026 | 22:45
Meta-ի գործադիր տնօրեն Մարկ Ցուկերբերգը ստեղծում է անձնական արհեստական բանականության գործակալ՝ օգնելու իրեն աշխատանքում, հաղորդում է The Wall Street Journal-ը՝ հղում անելով աղբյուրներին: Նշվում է, որ գործակալն արդեն օգտագործվում է փորձնական ռեժիմով և օգնում է Ցուկերբերգին ավելի արագ ստանալ տեղեկատվությանը: Օրինակ, այն կարող է գտնել հարցերի պատասխաններ՝ առանց մի քանի աշխատակիցների հետ խորհրդակցելու անհրաժեշտության, գրում է The Insider-ը:
Նախագիծը Meta-ի ավելի լայն ռազմավարության մաս է՝ արհեստական բանականությունն ընկերության բոլոր գործընթացներում ինտեգրելու համար: Նպատակն է՝ արագացնել աշխատանքը, կրճատել կառավարման շերտերը և թիմերն ավելի կոմպակտ դարձնել:
Արհեստական բանականության կիրառումը Meta-ում արագ զարգանում է։ Աշխատակիցներին խրախուսվում է ստեղծել սեփական գործիքներ, մասնակցել դասընթացների և կիրառել արհեստական բանականությունն իրենց առօրյա աշխատանքում։ Այս հմտությունները հաշվի են առնվում նաև նրանց աշխատանքի գնահատման ժամանակ։ Ընկերությունն արդեն օգտագործում է տարբեր լուծումներ, այդ թվում՝ անձնական գործակալներ, որոնք կարող են շփվել գործընկերների հետ օգտատիրոջ անունից, ինչպես նաև փաստաթղթերի և նախագծերի հետ աշխատելու գործիքներ։
Միևնույն ժամանակ, որոշ աշխատակիցներ մտահոգված են արագ փոփոխություններով և հնարավոր կրճատումներով։ Meta-ն նախկինում իրականացրել է լայնածավալ կրճատումներ. 2022 թվականին ընկերությունն աշխատանքից ազատել է շուրջ 11,000 աշխատակցի, իսկ 2023 թվականին՝ ևս 10,000-ի։ Չնայած դրան՝ ընկերության աշխատուժը կրկին աճում է և ներկայում կազմում է մոտ 78,000։
Ավելի վաղ հաղորդվել էր, որ չինական Alibaba կորպորացիայի միջազգային ստորաբաժանումը ներկայացրել է Accio Work AI գործակալների հարթակը՝ միջսահմանային էլեկտրոնային առևտրի ավտոմատացման համար: Այն նախատեսված է փոքր և միջին բիզնեսների համար և հնարավորություն է տալիս օգտագործել վիրտուալ օգնականների «ջոկատ»՝ շուկայի վերլուծության, մատակարարների որոնման, դիզայնի և պաշարների կառավարման համար: Ընկերությունը պնդում էր, որ հարթակը կօգնի կրճատել թիմերի աշխատանքային ծանրաբեռնվածությունը և արդյունավետ դարձնել գործընթացները, ներառյալ մաքսային ձևակերպումները և գործընկերների հետ բանակցությունները:
Նման տեխնոլոգիաների հետ կապված անվտանգության ռիսկերի մասին նույնպես հաղորդվել է. հետազոտողները Snowflake-ի Cortex Code CLI AI գործակալում հայտնաբերել են խոցելիություն, որը թույլ է տվել հարձակվողներին շրջանցել պաշտպանությունը, ներդնել կամայական կոդ և մուտք գործել օգտատիրոջ տվյալներին։
Թարգմանությունը՝ Էմմա Չոբանյանի
