Թրամփը հայտարարել է, որ Իրանը ցանկանում է «գործարք կնքել», և որ ԱՄՆ-ը բանակցել է Իրանի «հարգված առաջնորդի» հետ

ԱՄՆ նախագահ Դոնալդ Թրամփը լրագրողների հետ զրույցում հայտարարել է, որ Իրանը ցանկանում է «գործարք կնքել»։ Նրա պնդմամբ՝ ԱՄՆ դեսպանները բանակցություններ են վարել Իրանի «հարգված» առաջնորդի հետ։ Թրամփը չի նշել Թեհրանը ներկայացնող որևէ պաշտոնյայի անուն, միայն ընդգծել է, որ ԱՄՆ-ը չի խոսել գերագույն առաջնորդ այաթոլլահ Մոջթաբա Խամենեիի հետ։

Թրամփը նաև հայտարարել է, որ եթե Իրանի հետ համաձայնության հասնեն, ԱՄՆ-ը քայլեր կձեռնարկի հարստացված ուրանը դուրս բերելու համար, որը կարևոր է Իրանի վիճահարույց միջուկային ծրագրի համար։

Թրամփը նաև նշել է, որ որևէ լուր չի ստացել Իրանի գերագույն առաջնորդ Մոջթաբա Խամենեիից՝ հավելելով, որ չի ցանկանում, որ նա սպանվի։ Ըստ ԱՄՆ նախագահի՝ վստահ չէ, թե որտեղ է նոր գերագույն առաջնորդը, և արդյո՞ք դեռևս ողջ է։

Նա ասել է նաև, որ ԱՄՆ-Իրան բանակցություններում կան «հիմնական համաձայնության կետեր», որոնք պետք է հանգեցնեն Թեհրանի կողմից իր միջուկային նկրտումներից և հարստացված ուրանի պաշարներից հրաժարվելուն։ Թրամփը նշել է, որ բանակցությունները, որոնց անցկացումը, ի դեպ, Իրանը հերքում է, վարում են «բարձրաստիճան անձի» հետ, բայց ոչ երկրի գերագույն առաջնորդի։

«Մենք վերացրել ենք ղեկավարությանը առաջին, երկրորդ և մեծ մասամբ երրորդ փուլերում։ Սակայն մենք գործ ունենք այն մարդու հետ, որին ես համարում եմ ամենահարգված և ամենակարող առաջնորդը։ Մենք չենք ուզում ուրանի հարստացում, բայց մենք նաև ուզում ենք այն ստանալ»,- հավելել է նա։

ԱՄՆ նախագահը, միաժամանակ, հայտարարել է, որ Իրանում «ռեժիմի փոփոխություն» է տեղի ունենում, զգուշացնելով, որ եթե Միացյալ Նահանգների կողմից կապ հաստատված իրանցի գործիչների հետ բանակցությունները հաջողությամբ չպսակվեն, ապա ռմբակոծությունները կշարունակվեն։

Հիշեցնենք, որ ավելի վաղ Իրանից հերքել էին ԱՄՆ-ի հետ բանակցությունների մասին Թրամփի հայտարարությունը։

Թարգմանությունը՝ Էմմա Չոբանյանի