Նեթանյահուի պնդմամբ՝ Իրանն այլևս չի կարող ուրան հարստացնել, բալիստիկ հրթիռներ արտադրել

Իսրայելի վարչապետ Բենիամին Նեթանյահուն հայտարարել է, որ Իրանն «այլևս չի կարող ուրան հարստացնել և այլևս ի վիճակի չէ բալիստիկ հրթիռներ արտադրել», գրում է Times of Israel-ը։

Մամուլի ասուլիսում բարձր գնահատելով Իրանի դեմ պատերազմում նվաճումները՝ նա ասել է, որ Իրանն «ավելի թույլ է, քան երբևէ», մինչդեռ Իսրայելը տարածաշրջանային տերություն է, «և ոմանք կասեն՝ համաշխարհային տերություն»։ Նա նաև ասել է, որ Իրանի դեմ արշավը կշարունակվի «այնքան ժամանակ, որքան անհրաժեշտ լինի»։

Նեթանյահուի պնդմամբ՝ 20-օրյա մարտերից հետո «Իսրայելը հաղթում է, իսկ Իրանը՝ կործանվում», մատնանշելով Թեհրանի ռազմական կարողություններին, մասնավորապես, նրանց միջուկային և բալիստիկ հրթիռային ծրագրերին հասցված զգալի վնասը։ Ըստ նրա՝ Իրանի հրթիռային և անօդաչու թռչող սարքերի զինանոցները «զանգվածային կերպով քայքայվում են», և դրանք «կոչնչացվեն»։ Իսրայելը և Միացյալ Նահանգները համատեղ «վերացնում են արդյունաբերական բազան այնպես, ինչպես երբեք չեն արել», թիրախավորելով բազմաթիվ ճակատներում գտնվող օբյեկտները, հավելել է նա։

«Երեկ մենք ոչնչացրեցինք ամբողջ իրանական նավատորմը Կասպից ծովում»,- հայտարարել է Իսրայելի վարչապետը։

Նեթանյահուն ներկայացրել է նաև հակամարտությունում Իսրայելի նպատակները․ միջուկային սպառնալիքի վերացում,
բալիստիկ հրթիռների սպառնալիքի վերացում, այս երկու սպառնալիքների վերացում՝ նախքան Իրանը կարողանա դրանք ամրացնել օդային հարձակումներից պաշտպանված բունկերներում, պայմանների ստեղծում, որպեսզի իրանցի ժողովուրդը վերահսկողություն ստանձնի երկրի նկատմամբ:

Նա հակադարձել է լուրերին, թե ինքն ԱՄՆ-ին ներքաշել է Իրանի դեմ հակամարտության մեջ։

«Իսկապե՞ս որևէ մեկը կարծում է, որ ինչ-որ մեկը կարող է նախագահ [Դոնալդ] Թրամփին ասել, թե ինչ անի։ ԱՄՆ նախագահը միշտ որոշումներ է կայացնում այն ​​​​բանի վերաբերյալ, ինչը, իր կարծիքով, լավ է Ամերիկայի համար։ Այս դեպքում այդ շահերը բացարձակապես պարզ են։ Նախագահ Թրամփի հետ սերտ համակարգմամբ, Ամերիկայի և Իսրայելի, մեր զինվորականների, մեր հետախուզական ծառայությունների միջև սերտ համակարգմամբ, մենք կայծակնային արագությամբ հասնում ենք նպատակներին։ Գաղափարախոսական ֆանատիկները, այն խելագարները, որոնք կառավարում են Իրանը, իրենց գոյության իմաստը գտնում են արևմտյան քաղաքակրթության և դրա առաջնորդ Ամերիկայի ոչնչացման մեջ։ Նրանք փորձել են սպանել Ամերիկայի նախագահ Դոնալդ Թրամփին ոչ թե մեկ, այլ երկու անգամ: Հիմա նրանք շանտաժ են անում նավթի հետ կապված»,- հայտարարել է Նեթանյահուն։

Ըստ նրա՝ Իսրայելը չգիտի, թե ով է այս պահին Իրանում ղեկավարում։

«Ես վստահ չեմ, թե ով է այս պահին կառավարում Իրանը։ Մոջթաբան [Խամենեին]՝ փոխարինող այաթոլլան, չի ցույց տվել իր դեմքը»,- ասել է Նեթանյահուն։

Իրանում ռեժիմի փոփոխության հնարավորության վերաբերյալ Իսրայելի վարչապետն ասել է. «Դեռ վաղ է դրա մասին խոսել։ Իրանի ժողովուրդը պետք է ոտքի կանգնի։ Մենք կարող ենք ստեղծել պայմաններ, բայց նրանք որոշակի պահի ստիպված կլինեն օգտվել այդ պայմաններից»։

Նա հավելել է, որ Ռեզա Փահլավին  «բարության ուժ էր, որը փորձել է միավորել ժողովրդին՝ ժողովրդավարական կամ չափավոր անցումային կառավարություն ստեղծելու համար։ Նա հույս է հայտնել, որ այն կհաստատվի, չնայած կարծում է, որ «դեռ վաղ է դրա մասին խոսել»։

Ինչ վերաբերում է նավթի մատակարարումներին, Նեթանյահուն ասել է, որ կարևոր է ունենալ «այլընտրանքային ուղիներ նավթի հոսք ապահովելու համար՝ Հորմուզի նեղուցի և Բաբ-էլ-Մանդեբի նեղուցով անցնելու փոխարեն»։ Ըստ նրա՝ այդ տեսլականն «անկասկած հնարավոր է»։

Հարցին՝ արդյո՞ք Իսրայելը տեղեկացրել է Թրամփին իրանական գազային հանքավայրերի վրա վերջերս տեղի ունեցած հարձակման մասին, Նեթանյահուն պատասխանել է, որ «Իսրայելը գործել է միայնակ»։

«Նախագահ Թրամփը խնդրել է մեզ զերծ մնալ ապագա հարձակումներից, և մենք դա անում ենք»,- հավելել է նա։

Թարգմանությունը՝ Էմմա Չոբանյանի