27.10.2026 | 09:30
Հարի Քեյնը՝ «Ոսկե գնդակի» դափնեկիր
Վրաստանում ազգային սուգ է հայտարարվել Իլյա 2-րդ պատրիարքի մահվան կապակցությամբ
Քաղաքականություն
18.03.2026 | 12:25
Վրաստանում սգո օր է հայտարարվել կաթողիկոս-պատրիարք Իլյա 2-րդի մահվան կապակցությամբ: Կառավարության որոշման համաձայն՝ երկրի ամբողջ տարածքում վարչական շենքերի վրա կիջեցվեն պետական դրոշները։
Ավելի վաղ Վրաստանի առողջապահության նախարար Միխեիլ Սարջվելաձեն հայտարարություն էր տարածել՝ ցավակցություն հայտնելով պատրիարքի մահվան կապակցությամբ։
«Իմ խորին ցավակցությունն եմ հայտնում վրաց ժողովրդին այս մեծ կորստի կապակցությամբ, որի նմանը չեմ հիշում իմ կյանքում: Վրաստանը վաղվանից տարբեր կլինի: Առանց մեր սիրելի Պատրիարքի մեզ բոլորիս համար չափազանց դժվար կլինի»,- ասել է նա։
Իլյա 2-րդը մահացել է Թբիլիսիում՝ 93 տարեկանում։ Նա Համայն Վրաստանի կաթողիկոս-պատրիարքը, Մցխեթայի և Թբիլիսիի արքեպիսկոպոս և Պիցունդայի, Սուխումի և Աբխազիայի միտրոպոլիտն էր։
Իլյա II-ը Վրաց ուղղափառ եկեղեցու առաջնորդն էր 1977 թվականից, նա աշխարհի ամենաերկար ծառայող առաջնորդներից մեկը և օծման ամսաթվով ամենատարեց եպիսկոպոսներից մեկն էր։
Պատրիարքի վիճակը վատթարացել էր երեքշաբթի երեկոյան։ Նրան տեղափոխել էին հիվանդանոց՝ ստամոքսային արյունահոսության պատճառով։
Սուրբ Սինոդը որոշում է կայացնում նոր պատրիարքի ընտրության վերաբերյալ. այն ընտրում է երեք թեկնածուի, որից հետո Վրաց եկեղեցու ընդլայնված ժողովն ընտրում է Համայն Վրաստանի կաթողիկոս-պատրիարքին: Ժողովը գումարվում է պատրիարքական աթոռի տեղապահի կողմից՝ աթոռը թափուր մնալուց 40 օր հետո, բայց ոչ ուշ, քան երկու ամիս անց: Ընտրված է համարվում այն թեկնածուն, որը ստանում է ժողովին մասնակցող եպիսկոպոսների ձայների կեսից ավելին:
Թարգմանությունը՝ Էմմա Չոբանյանի
