ՀՀԿ ԳՄ մի շարք անդամներ չկան ցուցակում. կուսակցությանը միայնա՞կ են թողել

Հանրապետական կուսակցության նախընտրական ցուցակում ընդգրկված չեն կուսակցության Գործադիր մարմնի մի շարք անդամներ:

Օրինակ՝ ՀՀԿ ակունքներում կանգնած ԱԺ ՀՀԿ խմբակցության պատգամավորներ Սամվել Նիկոյանը, Գալուստ Սահակյանը, ավելի երիտասարդ թևից՝ Սամվել Ֆարմանյանը, Կարեն Կարապետյանը, Կարեն Ավագյանը, նախկին վարչապետ Կարեն Կարապետյանը, Սփյուռքի նախկին նախարար Հրանուշ Հակոբյանը,  Երևանի նախկին քաղաքապետ Տարոն Մարգարյանը, Արդարադատության նախկին նախարար Դավիթ Հարությունյանը, Տրանսպորտի և կապի նախկին նախարար Գագիկ Բեգլարյանը, ՀՀԿ կազմակերպչական հանձնաժողովի նախագահ Ռուբեն Թադևոսյանը և ՀՀԿ նախագահի տեղակալ Մուշեղ Լալայանը:

Ուշագրավ է, որ ՀՀԿ-ի համար այս դժվարին փուլում կուսակցության ակունքներում կանգնած ՀՀԿ-ականները չկան նախընտրական ցուցակում: Ինչո՞ւ են կուսակցությանը միայնակ թողել:

«Դա ձեր եզրակացությունն է, որ ես կուսակցությանը մենակ եմ թողել: Ես կուսակցության հետ եմ և շատ ավելի օգտակար եմ կուսակցության համար: Այս ընթացքում իմ հնչեցրած տեսակետները շատ ավելի կարևոր են, քան ցուցակում լինելը»,- ի պատասխան մեր հարցին՝ ասաց Սամվել Նիկոյանը:

Ըստ պատգամավորի՝ հիմա այնպիսի ժամանակներ են, որ շատերը, մասնավորապես՝ ինքը կուսակցությանը կարող  է շատ ավելի օգտակար լինել չգտնվելով խորհրդարանում:

«Այսօր խորհրդարանում նոր սերնդի գալու հետ մեկտեղ նոր որակական կամ արժեքային ինձ համար անհասկանալի և անընդունելի որակներ են լինելու, որտեղ գուցե իմ գործընկերներն ավելի արդյունավետ կարող են լինել, քան ես»,- ընդգծեց Նիկոյանը՝ հավաստիացնելով, որ ինքն իր բոլոր լծակները կներդնի ՀՀԿ-ի համար:

Սամվել Նիկոյանը համոզված է՝ այսօր Հանրապետականն ավելի շատ անելիքներ ունի , քան այն ժամանակ, երբ իշխանություն էր:

«Ես տեսնում եմ այն մարտահրավերները, որոնք կան  թե՛ արտաքին քաղաքական հարցերում, թե՛ անվտանգությանը, թե՛ տնտեսությանն առնչվող հարցերում»,- հավելեց Նիկոյանը՝ շեշտելով, որ ժողովուրդը ևս շատ մոտ ապագայում դա կզգա: