Արտակ Ադամյանն այլևս չի գլխավորի կանանց Հայաստանի հավաքականը

Արտակ Ադամյանը որոշել է այլևս չշարունակել աշխատանքը ֆուտբոլի կանանց Հայաստանի ազգային հավաքականում։ Մարզիչը հանդես է եկել հրաժեշտի խոսքով, հաղորդում է ՀՖՖ մամուլի ծառայությունը։

«Հարգելի՛ թիմակիցներ և ֆուտբոլասերներ,

Մեր համատեղ ճանապարհը Հայաստանի կանանց ազգային հավաքականում մոտեցավ ավարտին։ Այս ժամանակահատվածը լի էր մարտահրավերներով, հաղթանակներով և անփոխարինելի փորձով։ Սա հեշտ որոշում չէր, սակայն կարծում եմ՝ եկել է պահը։

Առանձնահատուկ շնորհակալություն եմ հայտնում ֆուտբոլիստներին՝ կամքի, համառության և ներդրած էներգիայի համար։ Դուք ապացուցեցիք, որ կանանց ֆուտբոլը Հայաստանում մեծ ներուժ ունի։ Շնորհակալ եմ մարզչական շտաբին և բոլոր աշխատակիցներին՝ նվիրված աշխատանքի և արդյունավետ գործակցության համար։ Շնորհակալ եմ նաև մեր երկրպագուներին, ովքեր անդադար աջակցել են մեզ թե՛ հաղթանակի, թե՛ պարտության պահին։

Իմ երախտագիտությունս եմ հայտնում Հայաստանի ֆուտբոլի ֆեդերացիային՝ վստահության, տրամադրած հնարավորության և աջակցության համար։ Մեր ֆուտբոլիստներին մաղթում եմ նորանոր հաջողություններ։ Վստահ եմ, որ նրանք դեռ շատ առիթներ կտան հպարտանալու իրենց խաղով»,- նշել է Ադամյանը։

ՀՖՖ-ն շնորհակալություն է հայտնել Արտակ Ադամյանին պրոֆեսիոնալ և նվիրված աշխատանքի համար։

«Արտակ Ադամյանի գլխավորությամբ մեր ընտրանին մեկ քայլ առաջ կատարեց՝ պաշտոնական խաղերում գրանցելով իր առաջին հաղթանակը և ցույց տալով, որ կանանց ֆուտբոլը Հայաստանում զարգացման մեծ ներուժ և խոստումնալից հեռանկար ունի։

Նրա նպատակասլաց և հետևողական աշխատանքի շնորհիվ թիմը կայացավ, և ամուր հիմքեր ստեղծվեցին հետագա հաջողությունների համար։ Այս ամենը հաշվի առնելով՝ համոզված եմ, որ կանանց ազգային հավաքականը նոր հաջողություններ է ունենալու նաև Արտակ Ադամյանի ստեղծած հիմքի շնորհիվ։ Վստահ եմ, որ նրա ներդրած ջանքերը դրական ազդեցություն կունենան Հայաստանում կանանց ֆուտբոլի զարգացման գործում։ Մաղթում եմ Արտակ Ադամյանին նոր հաջողություններ մարզչական կարիերայում»,- հայտարարել է ՀՖՖ նախագահ Արմեն Մելիքբեկյանը։

Արտակ Ադամյանի գլխավորությամբ կանանց Հայաստանի ազգային հավաքականը տարել է առաջին պաշտոնական հաղթանակը։ 2024 թ. ապրիլի 9-ին Եվրո-2025-ի որակավորման փուլում Հայաստանի թիմը 3։2 հաշվով հաղթել է Բուլղարիայի հավաքականին։

Հիշեցնենք, որ կանանց Հայաստանի հավաքականը ԱԱ-2027-ի որակավորման փուլում ընդգրկված է C լիգայի C6 խմբում, որի մեկնարկային խաղում 0:3 հաշվով պարտվել է Ղազախստանին: Հաջորդ հանդիպումը կկայանա ապրիլի 14-ին Բելառուսի հավաքականի դեմ:

Լուսանկարը՝ ՀՖՖ-ի։