06.03.2026 | 00:13
Արարատ Միրզոյանը Ջեյհուն Բայրամովի հետ հեռախոսազրույց է ունեցել
ԱՊԱՎԵՆԻ ԱՆԱՊԱՎԵՆ ԱՌՕՐՅԱՆ․ կյանքը նոր Հայաստանի հին գյուղերում․ մաս 16. ՏԵՍԱՆՅՈՒԹ
Հասարակություն
15.11.2018 | 15:30
«Ո՛չ դպրոց կա, ո՛չ մանկապարտեզ, ստեղ մեծացած երեխան անգրագետ է մեծանում »,- ասում է Լոռու մարզի Ապահեն համայնքի բնակիչ Մնացական Ղուկասյանը:
Մոտ 100 բնակիչ ունեցող Ապավեն համայնքը 2017 թվականին համայնքների խոշորացման ծրագրով միացվել է Սարչապետ համայնքին: Գյուղում չկա նաև բուժկետ և խանութ: 15 երեխա դպրոց են հաճախում 3 կմ հեռավորության վրա գտնվող Արծնի գյուղ: «Ոտքով գնում են դպրոց, գալիս, պատահում է ձիով եմ տանում»,- պատմում է 65-ամյա Մնացական Ղուկասյանը:
Ձմռանը անբարեկարգ ճանապարհները առատ ձյան պատճառով օրերով փակ են մնում, գյուղ գնալ-գալը դառնում է վտանգներով լի: «Կուզենք՝ ճանապարհը սարքեն, մի անգամ սարքել են՝ ջուրն եկավ, քշեց, տարավ: Կուզենք՝ գյուղի համար մի բան անեն էլի, գոնե մի մանկապարտեզ, մի բան»,- նոր իշխանություններից ունեցած ակնկալիքներից է խոսում մեր զրուցակիցը:
Գյուղի ճանապարհները երբեք չեն ասֆալտապատվել։ Երեխաները հաճախ դասերից հետ են մնում առատ ձյան և անանցանելի դարձած ճանապարհների պատճառով: «Ձմեռ ա , ձյուն ա գալիս, ճանապարհները փակ են մնում, չենք կարողանում դպրոց տանել, վեց երեխա ունեմ, չենք հասցնում առնել, հագցնել, պայմանները չեն ներում»,- իր հոգսերով կիսվում է 6 երեխաների մայր, Ապավենի բնակչուհի Անի Առաքելյանը:
Նրա չորս զավակները դպրոց են հաճախում Արծնի գյուղ: «էս երկու-երեք տարի է՝ դիմում ենք, որ մեքենա տրամադրեն, ասում են՝ բյուջեում փող չկա»,- նեղսրտում է Անին, ապա հավելում. «Գայլեր կան, առավոտը երեխաներին ճանապարհում ես ու չես սպասում….»:
«Ոչ մի բանով չեն օգնում, բայց էգուց բանակի վախտը որ գա, «պավեսկան» կդնեն ձեռքը, կասեն՝ դե՛ գնա: Որևէ օգնություն չեմ ստացել անգամ գրքերի փողը չեն տվել»,- ասում է բազմազավակ մայրը:
«Գնում ենք դպրոց անտառից գայլերը դուրս են գալիս, վազում են, չգիտես փախչե՞ս, թե՞ կանգնես»,- պատմում է Արծնի դպրոց հաճախող Արամ Մագոյանը:
Արծնիում դասերը սկսվում են սովորականից մեկ ժամ ուշ՝ 9:30, որպեսզի ապավենցի երեխաները հասցնեն անցնել 3 կմ ճանապարհը: «Կուզեի մի տրանսպորտ տրամադրվեր երեխաների համար, որ գոնե դպրոց գնայինք, գայինք»,- ասում է Արամը:
Ապավեն գյուղում տների մեծ մասը դատարկ է, դժվարությունները մարդկանց ստիպել են բռնել արտագաղթի ճանապարհը: Համայնքի տարեկան բյուջեն կազմում է 4 մլն դրամ:
