Սլովակիան հանել է Ռուսաստանի դեմ ԵՄ պատժամիջոցների արգելափակումը

Սլովակիան վերջին պահին հանել է Ռուսաստանի դեմ Եվրամիության պատժամիջոցների երկարաձգման գործընթացի վրա դրված արգելափակումը։ Սահմանափակող միջոցներն անմիջապես երկարաձգվել են ևս վեց ամսով, շաբաթ օրը՝ մարտի 14-ին, հայտնել է Եվրամիությունը։ Ինչպես AFP գործակալությանը հայտնել են դիվանագիտական աղբյուրները, Բրատիսլավայի կառավարությունը հրաժարվել է իր նախնական պահանջից՝ պատժամիջոցների ցուցակից հանել երկու օլիգարխների։ Այդ ցուցակում ընդգրկված է շուրջ 2500 ռուս օլիգարխ և կազմակերպություն։

Ռուսաստանի նկատմամբ պատժամիջոցները, որոնք սահմանվել են Ուկրաինայի դեմ պատերազմի պատճառով, պետք է յուրաքանչյուր կես տարին մեկ միաձայն երկարաձգվեն Եվրամիության բոլոր 27 անդամ պետությունների կողմից։ Սլովակիան արգելափակել էր այդ գործընթացը՝ պահանջելով օլիգարխների ցուցակից հանել Ալիշեր Ուսմանովին և Միխայիլ Ֆրիդմանին։

Եթե Բրատիսլավան չնահանջեր, պատժամիջոցների գործողության ժամկետը կավարտվեր արդեն մարտի 15-ին։ Այժմ դրանք ուժի մեջ կմնան մինչև սեպտեմբերի 15-ը։ Պատժամիջոցների տակ են գտնվում մոտ 2500 անձ և կազմակերպություն, այդ թվում՝ Ռուսաստանի նախագահ Վլադիմիր Պուտինը․ նրանց ակտիվները ԵՄ-ում սառեցված են, իսկ մուտքը Եվրամիություն՝ արգելված։

Սլովակիայի և Հունգարիայի պրոռուսական կառավարությունները նախկինում էլ բազմիցս սպառնացել են չերկարաձգել պատժամիջոցները և պահանջել են որոշ անձանց կամ կազմակերպությունների հանել պատժամիջոցների ցուցակից։ Սակայն ամեն անգամ՝ ինչպես և հիմա, համաձայնություն է ձեռք բերվել, թեև երբեմն վերջին պահին։

Միևնույն ժամանակ Հունգարիան շարունակում է արգելափակել Ուկրաինային տրամադրվելիք ԵՄ 90 միլիարդ եվրոյի վարկը՝ կապված «Դրուժբա» նավթամուղով Ռուսաստանից նավթի մատակարարումների դադարեցման հետ։ Ուկրաինական կողմի տվյալներով՝ հունվարին նավթամուղը վնասվել է ռուսական հարվածի հետևանքով և դուրս եկել շարքից։

Հունգարիան և Սլովակիան մեղադրում են Կիևին վերանորոգումը ձգձգելու և ենթադրյալ վնասը որպես պատրվակ օգտագործելու մեջ՝ նավթամուղի աշխատանքը դադարեցնելու համար։ Այս վեճի պատճառով Բուդապեշտը նաև արգելափակում է Ռուսաստանի դեմ նոր պատժամիջոցների փաթեթը։