22.05.2026 | 23:50
Անդրանիկ Թևանյանի նկատմամբ հարուցվել է քրեական հետապնդում պետական դավաճանության հանցակազմի հատկանիշներով
Նիստերը՝ դռնբաց, հարցերի մեծ մասը՝ չզեկուցվող․ ՏԵՍԱՆՅՈՒԹ
Քաղաքականություն
15.11.2018 | 13:09
Կառավարության նոյեմբերի 15-ի նիստում գործադիրը կարգավորեց իր գործունեության անցկացման կարգը՝ նիստերը դռնփակ և դռնբաց անելու մասին հարցը, որը, ինչպես Նիկոլ Փաշինյանն է ասում, ժամանակին աղմուկ հարուցած հարցերից մեկն էր։
Ըստ «Կառավարության կառուցվածքի և գործունեության մասին» օրենքում լրացումներ կատարելու մասին» օրենքի նախագծի՝ Կառավարության նիստերը կանցկացվեն դռնբաց, իսկ վարչապետի որոշմամբ՝ կլինեն նաև նիստեր, որոնք կանցկացվեն դռնփակ ռեժիմում։
Ըստ էության՝ Կառավարության նիստերը դռնբաց են անցկացվում Նիկոլ Փաշինյանի՝ վարչապետ դառնալու օրվանից ի վեր, սակայն դռնբաց նիստերին զուգահեռ հիմա շատացել են չզեկուցվող հարցերը։
Օրինակ՝ գործադիրի այսօրվա նիստի օրակարգում ընդգրկված է 39 հարց, որից մեծամասնությունը՝ 25-ը, չզեկուցվող է, մեկը՝ գաղտնի․ ստացվում է օրակարգում ընդգրկված հարցերի մեծ մասի քննարկումը դարձյալ փակ է մնում լրագրողների համար։
Իսկ որպես կանոն՝ չզեկուցվող հարցերը լինում են շատ կարևոր։
Նոյեմբերի 15-ի Կառավարության նիստի չզեկուցվող հարցերից են օրինակ՝ Գեղարքունիքի մարզպետարանին գումար հատկացնելու մասին, Հայաստանի Հանրապետության և Ամերիկայի Միացյալ Նահանգների միջև «Օտարերկրյա հաշիվների հարկային համապատասխանության ակտի» կիրարկմանն օժանդակելու համագործակցության մասին համաձայնագիրը վավերացնելու մասին», «Տեղեկատվական անվտանգության ապահովման ոլորտում հավաքական անվտանգության մասին պայմանագրի կազմակերպության անդամ պետությունների համագործակցության մասին» համաձայնագիրը վավերացնելու մասին», Ազգային ժողովի կողմից գնման գործընթաց կազմակերպելու և Կառավարության 2018 թվականի մարտի 6-ի N 230-Ա որոշման մեջ փոփոխություններ կատարելու մասին և մի շարք այլ հարցեր։
Աղավնի Սուքիասյան
