Իրանի նոր գերագույն առաջնորդը խոսել է ընտանիքի զոհված անդամների մասին

Իրանի նոր գերագույն առաջնորդ Մոջթաբա Խամենեին շնորհակալություն է հայտնել Թեհրանի դաշնակից զինված խմբավորումներին ամբողջ տարածաշրջանում, այդ թվում՝ Լիբանանում, Իրաքում և Եմենում։

«Ես նաև իմ անկեղծ երախտագիտությունն եմ հայտնում «Դիմադրության ճակատի» մարտիկներին», – ասել է Խամենեին պետական ​​հեռուստատեսությամբ  հաղորդավարի կողմից ընթերցված  հայտարարության մեջ՝ նկատի ունենալով Եմենում գտնվող հութիներին, Լիբանանի «Հըզբոլլահ» խմբավորմանը, ինչպես նաև՝ Իրաքում գտնվող դաշնակից խմբավորումներին։

Նա նաև ցավակցություն է հայտնել սգացող ընտանիքներին։

«Բացի հորիցս, որի կորուստը համընդհանուր վիշտ էր, ես նահատակների քարավանին վստահեցի իմ սիրելի և հավատարիմ կնոջը, որի վրա մեծ հույսեր էի դրել, իմ նվիրված քրոջը, որը նվիրվեց մեր ծնողներին ծառայելուն և, ի վերջո, իր վարձատրությունը ստացավ իր փոքրիկ երեխայի հետ միասին, և իմ մյուս քրոջ ամուսնուն՝ մի գիտուն և պատվավոր մարդու։ Մենք պետք է համբերատար լինենք և մեր հույսն ու վստահությունը դնենք Ամենակարողի շնորհի և օգնության վրա»,-ասվում է հայտարարության մեջ։

Իր ուղերձում Խամենեին կոչ է արել Իրանի ժողովրդին միասնության և նշել, որ Իրանը չի հրաժարվի հակամարտության ընթացքում զոհվածների համար վրեժխնդրությունից։

Խամենեին ասել է, որ պատերազմի ընթացքում «Իրանի ժողովրդի միասնությունն ու ներկայությունը ցույց են տվել նրանց վճռականությունը», և նա կոչ է արել շարունակել հանրության մասնակցությունը քաղաքական, սոցիալական և ազգային հարցերում։

Նա նաև կոչ է արել իրանցիներին պահպանել համերաշխություն և աջակցել միմյանց հակամարտության ընթացքում։

Խամենեին ասել է, որ Իրանը ուսումնասիրում է իր հակառակորդների դեմ նոր ճակատներ բացելու հնարավորությունը, եթե պատերազմը շարունակվի։ Թեհրանն, ըստ նրա, կպահանջի փոխհատուցում հակամարտության ընթացքում պատճառված վնասների համար և զգուշացրել, որ եթե փոխհատուցումները չվճարվեն, Իրանը միջոցներ կձեռնարկի «իր թշնամիների ակտիվների դեմ կամ կոչնչացնի դրանք»։

Նա նաև նշել է, որ ինքը Իրանի գերագույն առաջնորդ դառնալու մասին իմացել է երկրի պետական ​​հեռուստաալիքից։

«Ես հարգարժան Փորձագետների ժողովի քվեարկության արդյունքի մասին իմացա ձեզ հետ միաժամանակ և Իսլամական Հանրապետության հեռուստատեսության միջոցով», – ասել է Խամենեին։

Հիշեցնենք, որ  Խամենեին նաև  հայտարարել էր, որ «Հորմուզի նեղուցը փակելու լծակը» դեռ պետք է օգտագործվի Իրանի կողմից։ Միաժամանակ, նա հավելել էր, որ Իրանը «բարեկամության» քաղաքականություն ունի հարևան երկրների հետ, բայց խորհուրդ է տվել նրանց փակել ամերիկյան բազաները։

Թարգմանությունը`Էմմա Չոբանյանի