Քաղաքականություն
10.03.2026 | 15:48
Իրանի նորանշանակ գերագույն առաջնորդ Մոջթաբա Խամենեին Լոնդոնի արևմտյան մասում երկու շքեղ բնակարան ունի՝ «դեպի Իսրայելի դեսպանատուն տեսարանով»։ Այս մասին ասվում է Bloomberg-ի հետաքննությունում, փոխանցում է DW-ի ռուսական ծառայությունը։
Աղբյուրի համաձայն՝ երկու բնակարաններ, որոնք Մոջթաբան ձեռք է բերել տարբեր միջնորդների միջոցով 2014 և 2016 թվականներին, բայց վերջերս են հայտնաբերվել, գտնվում են իսրայելական դեսպանատան նույն փողոցում գտնվող շենքի վեցերորդ և յոթերորդ հարկերում, Քենսինգթոնի «Փելաս Գրին»-ում։
The Times of London-ը նույնպես մարտի 5-ին հաղորդել է, որ վիճելի բնակարանային շենքը «Իսրայելի դեսպանատան կողքին է՝ Փելաս Գրինում»։ Բնակարանները նաև մոտ են Քենսինգթոնի պալատին, որը Ուելսի արքայազնի և արքայադստեր՝ Ուիլյամի և Քեյթի պաշտոնական նստավայրն է։
Այս հաղորդագրությունները տարածվեցին այն բանից հետո, երբ ուրբաթ առավոտյան Լոնդոնում ձերբակալվեցին չորս իրանցիներ՝ Իրանի և Բրիտանիայի քաղաքացիներ՝ Լոնդոնի հրեական համայնքի հետ կապված «վայրերի և անհատների» հսկողության կասկածանքով։
Times of Israel-ի հաղորդմամբ՝ Քենսինգթոնի բնակարանների վերաբերյալ տեղեկատվությունը ստացվել է Bloomerg-ի հունվարյան հետաքննությունից, որը ներկայացրել է Մոջթաբա Խամենեիի անշարժ գույքը, որոնցից մի քանիսը ձեռք են բերվել Ալի Անսարի անունով միջնորդի և «կեղծ ընկերությունների» միջոցով, այդ թվում՝ Մեն կղզում գտնվող Birch Ventures անունով ընկերության։ Ըստ Daily Mail-ի՝ Քենսինգթոնի երկու բնակարանները, ենթադրաբար, արժեն շուրջ 40 միլիոն դոլար։
Bloomberg-ի հոդվածում ասվում է, որ Մոջթաբայի անշարժ գույքի ընդհանուր պորտֆելը՝ հարյուր միլիոնավոր դոլարներ արժողությամբ, ներառում է տասնյակից ավելի անշարժ գույք Լոնդոնում, այդ թվում՝ Լոնդոնի հյուսիսային Բիշոփս պողոտայում։
Թեև Մոջթաբան «իր անունով ակտիվներ չի գնում, նա ուղղակիորեն ներգրավված է գործարքներում, որոնցից մի քանիսը ձգվում են առնվազն մինչև 2011 թվականը», հաղորդում է Bloomberg-ը:
«Նրա ֆինանսական ուժն ընդգրկել է ամեն ինչ՝ Պարսից ծոցից մինչև շվեյցարական բանկային հաշիվներ և բրիտանական շքեղ գույք, որի արժեքը գերազանցում է 100 միլիոն ֆունտ սթերլինգը (138 միլիոն դոլար)։ Ընկերությունների ցանցն օգնել է Խամենեիին միջոցներ ուղղել, որոշ գնահատականներով՝ միլիարդավոր դոլարներ, դեպի արևմտյան շուկաներ՝ չնայած 2019 թվականին նրա նկատմամբ կիրառված ԱՄՆ պատժամիջոցներին»,- նշել է Bloomberg-ը՝ վկայակոչելով իր աղբյուրներին և արևմտյան առաջատար հետախուզական գործակալության գնահատականները:
Bloomberg-ը հայտնել է, որ հոլդինգները ներառում են նաև շքեղ առանձնատուն Դուբայի Բևերլի Հիլզում և եվրոպական բարձրակարգ հյուրանոցներ Ֆրանկֆուրտից մինչև Մայորկա»: Գնումների համար միջոցները փոխանցվել են Մեծ Բրիտանիայի, Շվեյցարիայի, Լիխտենշտեյնի և Արաբական Միացյալ Էմիրությունների բանկային հաշիվների միջոցով, հաղորդում է Bloomberg-ը՝ հավելելով, որ ըստ իր աղբյուրների՝ գումարը հիմնականում գոյացել է իրանական նավթի վաճառքից:
Bloomberg-ը հայտնել է նաև, որ գույքի պորտֆելի հետ կապված փաստաթղթերից ոչ մեկը չի նշում Խամենեին որպես անմիջական սեփականատեր։ Փոխարենը գնումներ են հայտնվում 57-ամյա իրանցի գործարար և շինարարության մագնատ Անսարիի անունով, ում հետաքննությունը որակել է որպես «ֆինանսական խողովակ» նոր գերագույն առաջնորդի և ընտանիքի ընկերոջ համար:
Հոկտեմբերին Մեծ Բրիտանիան պատժամիջոցներ է սահմանել Անսարիի նկատմամբ՝ Իսլամական հեղափոխության պահապանների կորպուսի (ԻՀՊԿ) հետ ենթադրյալ կապերի պատճառով: Հայտարարելով պատժամիջոցների մասին՝ բրիտանական իշխանություններն Անսարիին անվանել են «կոռումպացված իրանցի բանկիր և գործարար», որն «օժանդակել և աջակցել է թշնամական գործունեությանը»: Bloomberg-ը հայտնել է, որ Անսարին Կիպրոսի անձնագիր է ստացել 2016 թվականին, ինչը նրան հնարավորություն է տվել բանկային հաշիվներ բացել և ընկերություններ ստեղծել ամբողջ Եվրոպայում:
Անսարին իր փաստաբանի միջոցով Bloomberg-ին փոխանցած հայտարարության մեջ ասել է, որ «կտրականապես հերքում է, որ երբևէ ֆինանսական կամ անձնական հարաբերություններ է ունեցել Մոջթաբա Խամենեիի կամ Իսլամական հեղափոխության պահապանների կորպուսի հետ»: Նա նաև ասել է, որ մտադիր է վիճարկել իր դեմ սահմանված պատժամիջոցները։ Մոջթաբա Խամենեին ԱՄՆ-ի կողմից պատժամիջոցների է ենթարկվել 2019 թվականին՝ նախագահ Դոնալդ Թրամփի պաշտոնավարման առաջին ժամկետի ընթացքում:
Թարգմանությունը՝ Էմմա Չոբանյանի
