22.05.2026 | 21:07
Արթուր Օսիպյանը տեղափոխվել է հացադուլավորների համար նախատեսված խուց
Էն ժամանակ էլ Սերժ Սարգսյանը ձեռքը սեղանին չէր խփում. Ալիկ Սարգսյան. ՏԵՍԱՆՅՈՒԹ
Քաղաքականություն
14.11.2018 | 12:30
Ազգային ժողովի ՀՀԿ-ական պատգամավոր Ալիկ Սարգսյանը վստահեցնում է՝ արտահերթ խորհրդարանական ընտրությունները պատշաճ մակարդակով կընթանան, և դա բխում է հենց իշխանությունների շահերից։ Պատգամավորն ասաց նաև, որ չի կիսում տեսակետը, թե այս ընտրությունների քարոզարշավին ՀՀԿ-ն թիրախ կդառնա։
«Ում ընտրում են թիրախ՝ նրա վարկանիշն այդպես բարձրացնում են։ Ես չեմ կասկածում՝ ՔՊ-ն իրեն անհրաժեշտ ձայների քանակը կունենա, մեծամասնություն կլինի, իսկ եթե փորձի ՀՀԿ-ին ավելի շատ քարկոծել, դա կազդի հենց ՔՊ-ի վարկանիշի վրա»,- այսօր Ազգային ժողովում Factor.am-ի հետ զրույցում ասաց պատգամավորը։
Վերջինս նշեց՝ ուրախ է, որ չի առաջադրվել ռեյտինգային ցուցակով, բայց եթե առաջադրված լիներ՝ բոլորս կտեսնեինք դասական օրինակ՝ ինչպես է թեկնածուն հայտնվում ժողովրդի մեջ քարոզարշավի ժամանակ։
«Ես ասելու բան ունեմ իմ ժողովրդին, և նա ինձ երեք րոպեից կհասկանար։ Մի հարց չէր լինի ժողովրդի կողմից, որից ես կփորձեի խուսանավել․ առաջին հինգ րոպեն գուցե տարօրինակ հայացքով նայեին դեմքիս, հինգ րոպե անց՝ կկանգնեին կողքիս»,- ասաց Ալիկ Սարգսյանը։
Խոսելով ՀՀԿ նախագահ Սերժ Սարգսյանի՝ քարոզարշավին մասնակցելու հավանականության մասին՝ Ալիկ Սարգսյանն ասաց, որ դժվար ՀՀԿ նախագահը դուրս գա փողոց և քարոզարշավին մասնակցի, ավելի հավանական է, որ նա դրան կհետևի ՀՀԿ գրասենյակից, իսկ ինչ վերաբերում է ՀՀ 3-րդ նախագահի և կուսակից անդամների միջև հարաբերություններին, պատգամավորն ասաց․ «Էն ժամանակ էլ Սերժ Սարգսյանը ձեռքը սեղանին չէր խփում, հիմա էլ»։
Մանրամասները՝ տեսանյութում։
