Իրանական ԱԹՍ-ները հասել են Կիպրոս. Պաֆոսի օդանավակայանի տերմինալը տարհանվել է

Կիպրոսում Պաֆոսի քաղաքացիական օդանավակայանի տերմինալը տարհանվել է, երբ ռադարները երկնքում կասկածելի առարկա են հայտնաբերել, հաղորդում է Կիպրոսի հանրային հեռարձակման ընկերությունը (CPB), գրում է Meduza-ն։

Կիպրոսի կառավարության խոսնակ Կոնստանտինոս Լետիմբիոտիսը հայտարարել է Պաֆոսի օդանավակայանից շուրջ 60 կիլոմետր հեռավորության վրա գտնվող բրիտանական Ակրոտիրիի ավիաբազայի ուղղությամբ թռչող երկու անօդաչու որսալու մասին:

Այս միջադեպից մի քանի ժամ առաջ մեկ այլ անօդաչու թռչող սարք էր հարվածել Ակրոտիրիի ավիաբազային։ Բրիտանացի պաշտոնյաները կարծում են, որ անօդաչու թռչող սարքն արձակվել է՝ նախքան Մեծ Բրիտանիայի կողմից «հատուկ և սահմանափակ պաշտպանական նպատակներով» ԱՄՆ-ին իր բազաների հասանելիության մասին վարչապետ Քիր Սթարմերի հայտարարությունը։

Կիպրոսի նախագահ Նիկոս Խրիստոդուլիդեսն իր ելույթում նշել է, որ հարվածը հասցվել է իրանական «Շահեդ» անօդաչու թռչող սարքով։ Թռիչքի ճշգրիտ վայրը չի բացահայտվել։ The Guardian-ի տվյալներով՝ փորձագետները ենթադրում են, որ անօդաչուն կարող էր արձակվել կա՛մ ուղղակիորեն Իրանից, կա՛մ իրանամետ խմբավորումների կողմից, ինչպիսին է լիբանանյան «Հըզբոլլահ»-ը։

Հունաստանի պաշտպանության նախարար Նիկոս Դենդիասը հայտարարել է, որ Կիպրոսում կտեղակայվեն երկու ռազմածովային ֆրեգատ և երկու F-16 կործանիչ՝ երկրի օդային պաշտպանության հնարավորությունները բարելավելու համար։

Թարգմանությունը՝ Էմմա Չոբանյանի